Tilim Operation Ah Ralhrang 20 Leng An Thi I Meithal Zun 50 Leng CDF/CNA Nih An Lak
=========
CDF-Thantlang le CNA i bawm in ni (60) chung kahdohnak tuah mi Tilim Operation kong CDF-Thantlang nih thawngthanh nak a tuah. Tilim Operation cu 2022, December 29, zan sml 10:00 ah thok a rak si. 2023, January 1, ah ralhrang le palik nih hmunhma an lak nak inn 5 cu kan hrawh i mei kan khangh khawh.
2023, January 2, ah ralhrang le palik nih hmunhma an lak nak inn 2 cu kan hrawh i mei kan khangh khawh ṭhan. 2023, January 29, ah ralhrang lei thil chan ding in a ra mi MI-17 Transport Helicopter cu a thilri cheukhat kan hrawh khawh. 2023, February 8 le 9 ah ralhrang le palik minung 50 hrawng nih hmunhma tha ngai in an lak nak Thantlang khuapi chung palik sakhan kan lak khawh, hriamnam 40 leng kan lak chih.
2023, February 26, ah ralhrang lei thil chan ding a ra mi MI-Transport Helicopter pakhat a thilri cheukhat kan hrawh khawh ṭhan. Tilim Operation kahdohnak kan thok in tuni tiang ni (60) chung ah CDF-Thantlang lei in kan ralkap (4) le CNA lei in ralkap (2) nih Chinland caah an nunnak an pek.
Kahdohnak ni (60)chung ah hin ralhrang nih vanlawng in voi (95) bom a thlak. Ralhrang lei nih vanlawng hmang in cat lo kah nak a tuah lawng si lo in hriamnam thazaang tampi hmang in kahdohnak tuah mi a si caah kahdoh nak fakchin ding dirhmun a si, mipi tlunkal i ralrin ding in CDF- Thantlang nih Cathanh a chuah.
Hakha Um Palik Pakhat A Hriamthil He CDF-Hakha Sin Ah A Lut! Chin ramkulh, Hakha khuachung ah palik (senhnih) a ṭuan liomi pakhat cu 2023, February ni 25 ah hramhram uknak a latu SAC kuttang rianṭuan ka duh ti lo tiin mizapi dohthlennak ah ka tel ve lai tiah a hriamthil G-3 meithal 1, Megazine -4 le meithal kuan zeimawzat he Chinland Defense Force – Hakha sin ah a lut.
Chinland Defense Force – Hakha sin ah a lutmi palik pakhat cu CDF – Hakha nih lunglawm tein kan don pi in phaisa sing 30mmk kan pek, cu pin ah a humhimnak hmun a phanh tiang ṭuanvo kan laak tiah CDF-Hakha nih a thanhmi ah a langhter.
Hramhram uknak a latu SAC ralkap rianṭuannak doh a duhtu le khuapau dohthlennak ah tel a duhmi paoh cu Chinland Defense Force – Hakha sin ah pehtlainak tuah khawh peng kan si, cu pin ah a himnak nan phak tiang ṭuanvo kan in laak hna lai tiah Chinland Defense Force – Hakha nih February ni 26 ah a thanh.
SAC Ralkap Nih Thantlang Ah Bomb An Thlak Ṭhan. Nihin February ni 26 ah SAC ralkap nih van raldohnak Mi 35 le Mi 17 hmang in Thantlang khuachung ah bomb an thlak ṭhan tiah kan theih. Caan zeimawzat a rauh hnu ah SAC ralkap Mi 17 tu cu a khu tam ngai he Hakha lei ah zuang in rungtlang ah a ṭum tiah theih a si.
SAC Ralkap Hriamngan Thlah Ruang Ah Chungkhar Khat In Minung 3 Le CDF-Mindat Chungtel 1 An Nunnak Liam. Mindat peng ṭaiṭnay no.4 hmunhma lei ah SAC ralkap nih hriamngan an kah caah nunnak liammi an um tiah theih a si. February ni 25, zanlei ah Mindat hrambunh khahlahyiah 274 battalion nih cu hriamngan cu an thlah tiah tualchung mi nih an chim.
Chin ramkulh, Mindat peng hrambunh CDF-Mindat in bawino Salai Bili Aung Thang cu ralhrial dirhmun in a ummi hna cazin laak ding in a kal lio SAC ralkap hriamngan ruang ah a nunnak liam tiah CDF-Mindat nih cathanh a chuah.
Bawino Salai Bili Aung Thang cu SAC nih uknak a laak hlan ah Church pastor a rak ṭuan i, SAC ralkap nih uknak a laak hnu in CDF-Mindat ah a lut i dohthlennak ah aa pumpemi pastor pakhat a si.
Cu pin ah Mindat peng no.4 hmunhma lei ah SAC ralkap nih hriamngan an thlak caah chungkhar pakhat ah minung 3 an nunnak a liam i a dang minung 2 nih hliamhma an tuar tiah theih a si. Mindat pengchung ah SAC ralkap nih phone line a thah caah, khuachung thilcang fiang tein fehter a har tiah theih a si.
Tamu Ah SAC Ralkap Hriamngan Kahnak In Ngakchia Pakhat Nunnak Liam, Hliamtuar Zong An Um. Sagaing ramṭhen Tamu, Myomah (12/a) sang Nanhpalone ah SAC ralkap nih hriamngan an duhnak hmun poh an kah caah sangchung um pastor fa pakhat a nunnak liam, minung 2 nih hliamhma an tuar tiah theih a si. Nizan February ni 25 ah ngakchia cu innhmai lente aa celh lioah hriamngan cu a puak tiah theih a si. Hliamhma tuarmi minung 2 le nu pakhat cu Tamu siizung ah an kalpi hna tiah theih a si.
CDM Tuahmi Nurse Pakhat Cu SAC Nih An Tlaih Hnu Ah An Thah. Chin ramkulh, Falam siizungpi ah Nurse a ṭuanmi sayamah Daw Tae Tae Win cu CDM cawlcanghnak a tuah hnu in an khua ah dawr tuah in thil a zuar lio February ni 25 ah SAC ralkap nih an tlaih i an thah tiah theih a si. Sayamah Daw Tae Tae Win cu CDM cawlcanghnak a tuah hnu ah a umnak khua Sagaing ramṭhen Kata peng Moedakyi(မိုးဒါးကြီး) khua ah um in, a pum cawmnak ding caah a inn ah dawr a tuah tiah theih a si.
Dalan nih SAC ralkap sin ah sayamah Daw Tae Tae Win cu CDM cawlcanghnak a tuah leng ah CDF le PDF hna cu sii-ai thlopbulnak a tuahpiak hna, bawmhnak a pek hna tiin thawngpang an pek caah SAC ralkap nih sayamah cu kut hri ṭem in a inn cia ah an tlaih hnu ah an thah tiah theih a si. Cu hlan ah cun SAC ralkap nih rallam an sial caan ah a hrial tawn nain, tutan hi hrial loin a inn ah a um lioah tlaih le thah a ton hi a si.
Karen Ramkulh Kahdohnak Ah SAC Ralkap 11 An Thi, PDF 1 Nunnak Liam. Karen ramkulh, Kyainsaitkyi peng Bayatungsu(ဘုရားသုံးဆူ) khua palik sakhan cu February ni 25 ah tualchung hriamtlai phu nih luhhnawh in an kahdoh hna caah SAC ralkap 11 an thi, PDF in ralkap pakhat a nunnak a liam tiah Nagani phu nih cathanh a chuah. February ni 25, zinglei suimilam 6:00AM in Bayatungsu palik sakhan cu tualchung hriamtlai Nagani phu le ṭangṭi phufonh nih an kahdoh hna.
An kahdoh hna tlawmpal ah Bayatungsu khuachung ummi khahlahyiah 284 le khahlahyiah 97 in minung thazaang 30 hrawng he kaphnih kar kahdohnak a chuak. SAC ralkap lei nih bawmtu an thlah hna caah zinglei suimilam 7:00AM hrawng ah kahdohnak a chuak ṭhan, suimilam 8:00AM ah tualchung hriamtlai phufonh lei hnu an tolh tiah theih a si. Kaphnih kar kahdohnak ah SAC ralkap lei in minung 11 an thi, PDF lei in minung pakhat a nunnak liam tiah Nagani phu nih a thanhmi ah a langhter chih.
Madaya Peng SAC Ralkap Sakhan Hna Cu PDF Nih Drone Hmang In An Doh, 8 An Thi. Mandalay ramṭhen, Madaya peng ah SAC ralkap nih umhmun an khuarnak hmunhma hna thla khat chung drone hmang in bomb thlakhnawh an ton caah SAC ralkap 8 an thi tiah Natsoe Underground Revolutionary Army in Bu Natsoe nih a chim.
February ni 1 in 25 tiang Madaya pengchung ah SAC ralkap nih umhmun an khuarnak hmunhma hna cu Natsoe Underground Revolutionary Army nih drone hmang in voi 13 bomb an thlak hnawh hna, cu chung ah cun SAC ralkap 8 an thi hliamhma tuar an tam tiah theih a si.
Leave a Reply