Thantlang-Hakha Bus Accident Ah Aa Kongmi Le A Thimi: Thil Sining Theih Tawk!

December 14 zing Thantlang-Hakha aa thawhmi Chintaungtan Bus cu Bus sehlei tlamtlinlonak ruangah zing 7:40tluk Thantlang in Hakha lei Thanghrin Siazuatnak hmun lonh cho a kai lai ah lamthlang a tla i a hmun ah minung (2) an thi i a dang minung (9) fak ngai in hliam hma an tuar tiah theih a si.

Hi Accident ton lai motor hmaibik a thu ve mi Mai Tha Cuai Sung (aa khong vemi) nih “ cho tlawmpal kan rak kai ah a kai kho tilo I Gear thlen aa tim. Gear a lut lo tiah Driver pa nih voihnih thum khi a chim manh I Spare pa a tum i a ke a doh lengmang nain zei karhlanh ah lamthlang kan ril colh. Zei a cang kan theih ti lo. A hmaibik a thumi kan si tikah Driver a tlaknak hmunhma a donghnak ah a van kan hlonh. Motor thlalang vialte a kuai dih I mah incun ihlonh dawh kan si. A thi ding dirhmun in nunnak a kan hlanhtu kan Pathian cungah ka lawmtuk” tiah The Chinland Post ah a chim.

“Keimah le nu pakhat hi Chintaungtan hi silo in Taungzalat Gate in a rami kan si. Driver pa nih minung pahnih lawng nan si caah tiin Chintaungtan Bus cu a kan dawipi i mah ahcun a kan kaiter. Minung pahnih lawng kan si caah an sunghtuk ve cu ta a poi lo ticun kan kai ve ko i kan kai tlawmpal ah accident kan ton colh cu a si. Motor hnubik ah ka thu i motor a tannak tiang a thimi nu pakhat le atu Hakha an kalpi mi nu pakhat he motor chung ah kan tang. Motor voili tiang aa hlok tiang cu ka theih nain a donghnak ah ka ttang ka suknak kha a si rua ka thaw a ka phih I zeihmanh ka thei tilo. Hi bantuk kan thih lo hi cu Pathian hupphennak bak a si” tiah Sayakyi Dar Luai nih mi lengkai sin ah a chim.

Hi kong he pehtlai in Thantlang Palek Sakhan hmu Kyaw Naing Oo nih “thil sining ka hlat cuahmah lio a si. Motor ngeitu le thil sining kongah tazacuainak ding timtuahnak kan ngeih liopi a si. Thil fiang cu a hnu ah kan ichimh than te lai” tiah The Chinland Post ah a chim.

“Meeting ka ngeih caah mizaw hna dirhmun cu kan chimh than te lai” tiah Thantlang peng siibawi Dr. Tunpua nih The Chinland Post ah a chim. Accident a si le cangka in Chin ramkulh Social Minister kan pehtlaih nain phone a tlai lo.

Chin ramkulh Chimrelnak nawlngei Minister Soe Htet nih “Accident ah aa telmi hna caah chanchuahnak le a herhmi ngandamnak lei Chin ramkulh Cozah in kan zuam cuahmah a herhningin kan pehtlaih cuahmah ko hna” tiah The Chinland Post ah a chim. Accident khondennak hmun ah a thi colhmi minung (2) cu Thantlang No.3 a ummi Chintaungtan gate ah arak tuan balmi Siang Tin Thluai@Siangbeu (38) le Thantlang No.1 a ummi Pi Sung Hnem(94) an si.

Hliamhma a tuarmi minung (9) cu 1. Mang Hniang, Thantlang No.3, 2.Run Ceu Thang(Mawtaw Mong),Thantlang No.1, 3.Pi Mery Than,Thantlang No.1, 4.Pi Tial Sui,Thantlang No.1 um Aibur khuami, 5.Mai Tha Cuai Sung,Thantlang No.1 um Aibur khuami, 6.Sayakyi Dar Luai,Thantlang No.1 um Aibur khuami, 7.Nu Angrly,Thantlang No.1 um, 8.Pi Bu Sung (Tisen khuami), 9. Bawi Hnem Sung (Tisen) hna an si. A zual deuh timi Mang Hniang, Run Ceu Thang le Merry Than hi Hakha siizung kuat an si. Nu Angrly (kum 7) hi a chung le Hakha an um caah Hakha kuat ve a si i Thantlang ah Pi Tial Sui, Sayakyi Dar Luai, Mai Tha Cuai Sung, Pi Bu Sung le Bawi Hnem Sung hi Thantlang siizung ah an thlop cuahmah lio hna a si. Accident lai zing Chintaungtan Bus aa citmi an zapi minung (11) an si i Spare pakhat lawng a himmi a si, minung (2) an thi, hliamhma minung (9) nih an tuar tiah kan theih.

Khondennak kongah motor ngeitu chungkhar lei le spare kan pehtlai kho rih hna lo. Khondennak an ton le cangka in Thantlang siizungah X-ray le zohfelnak tha tein an tuah colh hna. Thantlang MP Dr. Hmuh Thang, zung upa le khua nupa nih lenkainak le a herhmi tawlrelnak an ngei colh tiah theih a si. Khondennak ah ruh lei rawhnak a tongmi Thantlang siizung a ummi chungin minung (4) cu Pu Phun Thleng (Lian Chawn Pa) nih a thlakpiak than hna tiah theih a si.

Pathian nih Ruh remhthiam Pahrang a pekmi Pu Phun Thleng (Lian Chawn Pa) Mizaw a zoh lio/ TCP

Chintaungtan Bus hi Tlangpi Chum Ling (Hakha um) ta a si. Motor hi Gearbox a rawk a timi le transfer a rawk a timi an um cio nain zei ruang set dah a si ti theih khawh a si rih lo. Hlan lio fighter Bus a si lengah Hakha Thantlang kar aa cit balmi nih a rawh pah lengmang cangmi a si tiah an chimmi kan theih. Credit: TCP-Hakha| 2020 December 14|