Thantlang CNLD Dirhmun Le Thawngpang Fiang An Rak Langhter Mi

Thantlang CNLD cu admin lei in buainak a um ruang ah CEC lei nih Chairman le Secretary cu an rak dinh ter cang hna tiah kha fiang tein kan rak theih cio dih cang mi a si.

Cu buainak cu felfai tein zoh ding ah le siamremh than ding ah CEC lei nih CEC member Pu Ling Hung (Vice Chairman- Central) le Pu Mang Hlei Thang an thlah an thlah hna I Hakha in CNLD upa cheukhat zong nih an zulh ve hna. Cun Thantlang CNLD ah Chairman le Secretary zong thim than nak an ngei kho cang hna.

Thantlang CNLD hi an I tthithruai ning a rak chiat ngai caah EC 94 chung ah hin minung 5/6 hrawng lawng nih khuakhan lairel nak hi an rak ngei lengmang. Cu ruang ah EC member thar 48 zong thim than an si I a herh mi dang kong vialte hna zong cu EC thar nih cun tuanvo lak ding a si cang lai. Covid-19 ruang ah minung tampi hmunkhat pumh khawmh a ngah lo ruang ah a tu bantuk in khuakhan nak an ngeih zong hi a si.

EC thar ah cun Thurawn Upa 6 an tel i Chairman Pu Siang Cung Bik, Secretary Salai Fung Lian Thang an si.

Thantlang EC in MP a cuh ding mi hna pawl cu:

Amyota – Dr. Van Hmun Lian

Pyituh – Salai Van Bawi Lian

Ramkulh 1 -Pi Chin Chin Pekthang

Ramkulh 2- Pu Rung Kaw pawl an si.

Thantlang CNLD Chairman hlun Pu Lal Maung Cung cu Chin National Party ah a lut I Ramkulh Hluttaw no. 1 ah a cuh ve than lai tiah zong theih a si. CNP hi an dirhnak a sau rih lo mi a si I Magway Ramṭhen, Siṭuh Ṭaya peng I Asho Chin mi pakhat nih a dirh mi a si I hmundang ah hin member zong an ngei tuk lemlo.

Cun Thantlang hi miphun duhdawt nak lei ah a tthawng ngai mi an si caah tutan 2020 thimnak ah hin CNLD nih teinak an hmuh te ko lai tiah Pu Mang Hlei Thang nih cun a chim.

Source: Meifar Thuthang

(Falam-Halkha)

 211 total views,  1 views today

This function has been disabled for Chin 11 News.