Thantlang Ah Sathah An Khap Dih Ko Nain Quarantine An Chiah Mi Hna Pawl Voksa An Dangh Khawh Hna

Thantlang khuapi chung cu vok a thi mi an rak tamtuk ruangah a luancia December thla thok in sathah an rak phih/khar dih cang mi a si ko nain Covid-19 ruang ah hmundang teah Quarantine chiah mi hna pawl cu voksa pek an si nak kong quarantine an chiah mi hna chung in an chim mi theih a si.

Quarantine an chiah mi hna chung in a min langhter awk a tha lo mi pakhat nih a chim mi cu “Thantlang cu vok zawtnak in a thi mi an rak tamtuk ruang ah sathah lo ding in an phih/khar nak a sau cang. Cu ruang ah sathah an khap lio a si caah voksa kan pe duh hlah uh tiah tuanvo ngeitu sinah kan chimh hna hnuin an kan pe ti lo. Voksa hi voithum tiang cu an kan dangh ko” tiah a chim hi a si.

Thantlang ah hin a luancia December thok in nihin tiang ah vok zawtnak ruang ah a thi cang mi hna hi vok 150 lengkai an si cang hna. Hi vok zawtnak ruang hin minung cu vok zawtnak nih a phak hna lo zong ah vok le vok cu an zawtnak an I chawn peng rih ko hna tiah Tlantlang sipin bawi Van Za Uk nih cun a chim.

Saram sibawi pawl chim nak ah cun hi vok zawtnak hi minung cung ah cun a kai kho mi a si nain vok le vok cu awl-zaang tein an I chawn khawh caah an thi cawlh ko hna. Asianin kan chek hlai cuahmah ve hna lio a si ko caah hi vok zawtnak a dih hin cun sathah nak zong an on than ko lai tiah an chim.

Thantlang ah sathah phih/khar a si ko nain Quarantine an chiah mi hna pawl voksa  an pek mi hna kong ah Thantlang ah a um mi mino cheukhat nih cun acozah lei zohkhanh nak a tlawm tuk ruang ah a si tiah an chim ve. “Acozah nawlngeitu hna nih sathah an phih khar caah anmah nih a herh mi cu an pek hna awk a si ko. Hi sathah an phih khar hnuin Voksa zong kan ei kho ti lo. Cheukhat chungkhar nih cun a thli thup in an thah I a ei mi zong cu an um ve ko hna” tiah an chim.

Thantlang ah quarantine chiah mi hna pawl hi minung 100 hrawng an si tiah zong theih a si.

Source: Chin World

 262 total views,  1 views today

This function has been disabled for Chin 11 News.