Suu Kyi Hi ICJ Ah Kal Lo Awk Tha Lo A Si – Zasang Cinzah

Gambia tazacuai ka ASSK nih a cohlangmi le defence tuah awk ah Hague ah a kalmi hi, kal lo awk a thalomi dirhmun ah a dir caah a si.

ASSK hi 1990 in 2015 election a luh hlan chung vialte kha human right le pro-democracy Activist pakhat a rak si. Asinain 2015 election a luh hnu in politician a si. Politics lei a hngal thiammi caahcun, human rights activist le politicians an dirhmun aa dangnak hi ifiang cio a si bantuk in, ASSK zong politics lei a luh hnu ah aa ralrin dingmi a tam tuk cang. Mizapi mithmai a zoh a herh. Ralkap he riantuanti a herh.

Tulio Kawlram hruaitu cu ASSK a si bantuk in Gambia nih taza an cuaimi hi, amah ASSK an cuaimi a si. Amah hi top wanted list ah an chiah ve tikah Hague ahhin kal lo awk a ttha ti lo. Kawl Ralkap dirhkamh sawhsawh khi a si ti lo. Amah le amah a dirhkamnak zong a si i, Kawlram/Myanmar rampi a dirhkamh zong hi a si. Amah ASSK dirhmun in zoh ahcun, she has no choice, ti ding bak a si.

ICJ ah Kawlram taza an cuaimi thawngin hmailei ah zeibantuk miaknak/benefit or political gain dah Kawlrammi caah a um kho lai? timi hi khua a ka ruahter ngai. Atu tiang ah a ruah awk ka hngal lo. Kawlrammi caah hlawknak a chuahpi ding tazacuai a si ahcun, a tha tuk ko hnga nain Kawlram buaitertu chin hnga a si sual ahcun a poi ngai ve lai.

Naite International press nih ASSK bia an hal lio ahkhan New York Times nih Rohingya kong ah a holh lonak kong an hal. A lehmi hna cu, Kawlram mipi lei ttih ruang ah daite in ka ummi siloin, ka tihmi cu buainak meici alhter chintu ka si sual lai timi hi ka tih deuhmi a si tiah a leh hna. By: Zasang Cinzah 

 

 199 total views,  2 views today

This function has been disabled for Chin 11 News.