Sui Thantlang CNLD Chungin Thilcang Mi Kong Ah Catial Thiam Salai C Alexander Cabia

Catialtu: Salai C Alexander 

MP phunphai vuanci phunphai si hnu in zaraan van si ṭhan khi a har bak an ti. Mipi thimmi van si hnu i van ṭilh ṭhan khi cu a har bak ko, an ti.

US President Obama kha term hnihnak a peh hnu, sentari cong le rawlpetu khat ṭhup dirhmun in zaran mipi nunning kir lai kha a rak zenh tuk ve.   “Ka zenh tuk,” a rak ti lo. A muihmai in ai thei. Trump lebang kum 3 le zeimaw a van teh hnu cun, ṭum hrimhrim a duh ti lo. A baan rawt hau phun in a um.

Nain, democracy ram, phung le phunghram tang i caan sau tuk khuasa cangmi hna nihcun, minung sining an duhnak bang a si kho ti lo, ti khi an hngalh.  “I lungsak ko cang ning” ti khin ihnemhnak lam ikawlzia an ithiam hau.

Korea le Japan phunphai pawl khi zeimaw zawn i uar an um ngainak a um. Mipi thimmi an si nain, anmah nih an hei sual tak theng lo hmanh ah, an sahlawh maw, an nupi le maw, an fale maw, nih ziknawh le eirhmuar tuah ruang i “scandal” minchiatnak an von ngeih bak cun, an ithat mei. Mah le mah ithah cu a ṭha ka tinak si lo. Nain, an pasal tuk ka ti. Khi pawl tam deuh cu, biaknak nei lo deuh an si le mu.

Naite takah, Seoul khuabawi pa cu ai that mei ko. Seoul khualipi cu New York khuapi nakin milu an tam deuh. Sualnak zong a khat. Phaisa zong a tor lengluang. Mirum an ikalh. Chawlet phunphun rel cawklo an si. Cu pa tu cu, zu ding sa-ei phunphai zong si lo. A rian a tei lo zong khi si lo. A fit ve bak an timi khi si. Nain, kum 60 renglo tarpa te nihcun, a secretary pawl a dau lelek rua hna.

Cu a daumi nungak pawl nihcun an report. A party le a chungkhar, a hawikom vialte an hmai a khah lo tuk hna ruangah amah le amah cu ai that.

Bianabia sau ngang in ka van ikuaihter. Ka kalpi duhmi cu, nai tan Sui Thantlang, Chinram chung i democracy phung a zalen biknak timi khuapi, a palhmi cu kutdong in ai sawh ngammi pasal pawl khuasaknak khua i a cangmi thil kong kha si.

Vei kha MP zawt in a zawt ve tikah, MP bo khat cu a rak ngah bal cang ko nain, bo hnihnak a von haal rih. Tikah, thinlung nu deuh kan ti cu, tappi kauh ceo lawng khua a rak hmu ko khah.

Zei tangah dah ka um, zei policy in dah kan kal, zeidah kan nawrte lai timi kong ah zeihmanh ruahmi a ngei lo. “A lu, a hlipi ka si” timi lungput a ngei.

Cu bantuk ruahnak ngei pawl caah tang ṭum cu a har taktak. MP si hnu i ṭilh cu a har an ti. Nan ka zumh lo cun, va hal hna uh. An celh cio lomi thil a si.

Vei zong cu a lungte fim pah i, MP a si khawhnak ding lam a har in ai ruat. “Pasal, an ka hnon zongah, keimah tein ka dir kho” timi Pa ruahnak a ngei lo.

Nithawng aa rak ichinhmi huham in mi uk a duh rih. Tikah, zeidah a tuah? Aa rak ichinhmi nithawng kha hrawh dih le khiah dih a duh lai. Cucu nu ṭiaṭumlo zia si cuh! A zual chin lengmang te lai. Hnemh caan zong si rih lo. Nan hnemh ahcun, “an ka neek” tiah aa ruah lai. Lam lawlaw ulaw, a lung fim te lai.

Pa a si ahcun, Kawl party zong a ṭanh hlei lai lo. A nithawng hlun kha a hlam te ko lai. A nu belte cun, a thih hlanlo an huat cang hna lai.

 186 total views,  1 views today

This function has been disabled for Chin 11 News.