SOCIAL MEDIA KONG I USA President Trump-Order Cu Zeidah A Si? By Si Bawimang Lian

President D. Trump nih order a chuah tharmi cu “Federal-law chung i ‘Section 230’ khi thlen ding.” ti a si. Mah phung hi 1996 ah tthancho ai thawkmi Internet hrambunh company pawl a hnu cun Social Media Twitter, Facebook, Google, Yahoo le a dang Myspace, Bebo ti bantuk pawl runvennak caah sermi a rak si. A sullam cu tulio a larbik Twitter, Facebook, Instagram le Google tibantuk pawl hi a hmangtu (nanmah/kanmah) nih zeiti kan hman zong ah hi social media company ngeitu hna nih ttuanvo a ngei lo.

Mah cucu Twitter nih President Trump i Twitter ah ca a postmi Fact Check tuah khawhnak Links a chiah piak ruang ah Trump cu a thinhung i Social media khar le phih ding tiang ai hrocer. Asinain President zong nih amah nawl in kharnak nawl cu a ngei lo, Congress nih hnatlak lo ahcun. Sihmanhsehlaw, phung thlen ding order pek khawhnak nawl cu a ngei i cucu zong Federal-law a si caah an hnatlakpi a herh.

FACT-CHECK timi cu na chimmi asiloah na tialmi thil kong kha a si taktak le si taktak lo a langhtertu a um a si ahcun mah cu zoh piak khi a si. Abiana ah “Rev. David Lah cu Canada ah thong zong a tla bal, pial sual Khrihfa sin in ai thlengmi a si.” ti phun in Kawl cheu khat nih Facebook ah an chimmi nan hmuh cio. Mah kha a si lo tiah David Lah lei ttanh in na chim lai nain Canada Newspaper le records zohfel (fact-check) hnu lawng ah a si tak le si tak lo theih khawh a si.

Zeidang kong cu um rih seh, Coronavirus a chuahka te ah biachuak vai, biasiphai a phunphun kha Facebook, Twitter, Youtube tibantuk ah an post. Mi thin an phanter, lungre an theihter, a si lomi, a dik lomi thawngpang le theihnak (info) an chuah tuk caah Internet hrambunh company pawl nih Fact-check cu biatak ngaiin an tuah i Mirang holh lawng an tuah khawh rih bu ah lih le phuah-cawp Corona kong a tamning cu a mak. Corona kong thil dik taktak nakin phuah-cawp, ruahdawmh in chimmi le mi a hlengmi post a tamdeuh ti a si ko khah.

Cu bantuk cun cozah ithim lai ah politician pawl nih mi lemsawi le lunglak khawh nakding ah an thiamnak vialte an chuah cio i bia an chim tikah Fact and Data timi kha biapi ah chia lo in an duhduh in mi lung thawhnak men, lung lak khawhnak paoh kha an chimrel caah Newspaper lian cheukhat le Fact-check company pawl nih an langhter lengmangmi khi a si.

Twitter hlan piin Facebook-platform ah Fact-check an chiah diam cang. Atu hi Twitter nih a hun tuah ve i Trump in ai thawk caah Trump ttanhtu le conservative aa timi pawl an thin cu a hung ngai i atu President-order tiang a chuah phah.

Asinain Twitter nih Trump a palh, a palh lo ti langhter theng kha ai timhmi a si lo, ahopaoh ca an postmi fact-check tuah tlak a si timi paoh cu Facebook bantuk in Fact-check nak links kha a um cang lai, i cucu a reltu le Twitter hmangtu cung ah aa hngat ding a si ko. Ca ka relmi, ka hmuhmi info hi a dik le dik lo a biapi ah ka chiah a titu caah a ttha ngaimi a si ko. Mah cucu Censor* a sinak pakhat hmanh a um lo. A dik mi info kan theih khawh nak le thimding a tamdeuhnak tu khi a si. Zalong te chimrelnak a hrawk le a dawnmi a sinak a umlo.

President-order hi a tlamtlin i Federal-law Section 230 cu cu Trump duh ning tein an thlen a si ahcun Social media company pawl caah thil har a si lai. A ruang cu nangmah keimah nih thil ttha lo kan post tikah anmah kha ttuanvo an ngei cang lai i taza i cuai tikah cozah nih mah company pawl kha a runveng ti hna lai lo. Ralhrang kong na post zong ah siseh, mi thih khawhnak, mi tlirh khawnh le mi mualphoh tibantuk zeitluk mi nek le soisel, cun zeibantuk cachia na post zong ah na postnak social media nih post an in onh he ai khah caah anmah kha ttuanvo an ngei lai tinak a si.

Cucu social media company pawl nih cohlang kho lai maw ti biahalnak a um. An cohlan khawh ding cu a si lo, i phung an thlen a si ahcun company cu a dir kho hnga lo, a hmangtu tuahsernak mah nih tuanvo lak cu hodah duh lai?

Reuters nih Section 230, president-order he pehtlai in a ttialmi: https://www.reuters.com/…/explainer-what-is-section-230-and…
________
Information maw kan pek hna ideology le thluak dah kan i barh timi hi catialtu he a reltu he ruah awk ngai cu a si nain Laimi cu Lo kan thlawhnak kan kut bommi a kek dih rih lo.

 

 228 total views,  1 views today

This function has been disabled for Chin 11 News.