Siizung Pakhat Ah Puah Keh Nak Faktuk In A Chuah Ruang Ah Mizaw 19 Nunnak A Liam

Iran ram Tehran City chaklei ah a um mi siizung pakhat chung ah nizan June 30 ah khan siizung chung ah an chuah mi Gas pawl puahkeh nak a chuah ruang ah siizung chung mizaw 19 nunnak a liam pinah minung tamtuk nih faktuk in mei hliamhma an tuar hna.

Hi puah keh nak a chuahnak hmun hi tihnung ngai in meikhu an chuah len ko mi hna cu lamhla ngai in ISNA Media Agency pawl nih an zung in an rak hmuh hi a si. ISNA Media pawl cu a rannak in thawngpang fiang theih duh ah an kal tikah puahkeh nak a chuahnak siizung hi Sina Athar siizung a si I siizung chung ah an chiah mi Gas pawl cu mei nih a rak tlaih sual mi ruang ah siizung chung vialte mei nih a kangh dih nak hi a si tiah an chim.

Hi puahkeh nak ruang ah hin pa 15 le nu 4, an dihlak in minung 19 nunnak a liam hi a si I siizung chung ah an hman mi Gas dur pawl a puak mi ruang ah a si tiah siizung riantuan tu hna nih cun an chim. Gas puah nak ruang ah hliamhma faktuk in a hmu mi hna zong cu siizung dang ah Emergency in an thial cawlh hna. Cun hi siizung hi Iran ramchung Covid-19 mizaw pawl an zohkhanh nak hna siizung a si ruang ah minung tamtuk luh chuah lo ding ah police pawl nih ralrin an pek hna.

Iran ram hi Coronavirus nih faktuk in a phak ve mi hna ram an si ve I ramchung dihlak ah mizaw 225000 an um cang I cu chung ah a thi mi hi 10700 an si cang tiah cozah lei thawngthanh ning cu a si.

Source: Akon Thi

 112 total views,  1 views today

This function has been disabled for Chin 11 News.