Shane Ram Chung Khuate Cheukhat Cu Nu Nih Fapa Ngeih Ding Hi An Duh Ti Lo

Kawlram chung ah thawngpang chia tamtuk chung in hi thawngpang hi cu ngaih a chia tuk hringhran mi thawngpang a hun si i cucu hringtu nu a si mi hna nih fa an ngeih tikah fapa an ngeih ding hi an tih tuk hringhran cang hi a si. Hi thawngpang hi hringtu nu pawl nih mitthli he an au thawng zong a si i cheukhat cu kum 50 cung lei lawngte an si hna.

Shane ram nichuah lei Tachileik khuapi in minutes 45 hrawng mawtaw in kal nak hmun Yanshin khua ah a um mi hna nu pawl cu fapa ngeih an duh ti lo i fapa an ngeih a si ah cun an chuahka hmanh in thah le nawn cawlh hi an duh cang hna. Tachileik pengkulh hrawng ah a um mi khuate pawl hi pa a si paoh cu riihai sii (bing, no.4) tibantuk hi an dihlak ti nawn in a tawngtuk mi an si hna caah cu riit sii an tawngh cang hnu ah cun an nupi, hringtu nu le an farle zong ruat ti loin duhchung in an vuak lengmang hna hi a si.

Hi kong he pehtlai in Nomi (kum 53) nih a chim mi cu “kei hi fapa pali a ngei mi ka si i an dihlak in riit sii a tawng mi an si hna. Riit sii an tawngh cang hnu ah cun kei hi pitar ka si cang ti zong an ruat kho ti lo caah an duhtawk in an ka velh lengmang i lamkal kho lo le thut hmun i thial kho lo in an ka vuak lengmang. Riantuan an duh ti lo tangka an ngeih lo tik i ka pekkhawh ti hna lo ah cun kei cu vuakding lawng ah an ka ruah cang ko” tiah a mitthli he a chum.

Cun Daw Ney Moe (kum 55) zong nih a chim ve mi cu “fapa pahnih ka ngeih hna i riit sii nih a lemtuk cang mi an si ve caah an ka tukvelh ning hi ka celh ti lo caah voitampi cu thih ding in sii ka ding lengmang ko nain ka thih caan nih a ka phan rih lo. Yanshan khua ah a um mi hna nu pawl nih hin fapa ngeih ding hi cu nunchung hell tlak ah kan i ruah ko cang” tiah zong a chim ve.

Riit sii an ngol khawh nak hnga ding ah biaknak leiin an tuah mi camping le crusade zong ah kan chiah lengmang hna, cozah sizung tha tha  zong ah kan chiah ko hna nain zeihmanh santleih nak a ngei lo tiah zong Yanshin khua i Pastor Yury nih cun a chim ve. Riit sii hi a dih cikcek hlan chung paoh cu fapa hrin ding hi kan duh hrimhrim ti lo tiah Yanshin khua nu tampi nih cun an mitthli he an au hna.

Ref: Cele.mmexpres

 380 total views,  1 views today

This function has been disabled for Chin 11 News.