Senthang Miphun Le Mipi Nih NLD Minung Kan Sungh Hna Ruangah Ziah Kan Lung A Fah Khun?

By Salai Van Maung Ling 

A ralai mi 2020 thimnak ah hin Kanmah Senthang miphun chung in khua ramkhel (politic) a luh sual lai ti phang a um ngaingai. SYUSF upa hruainak in an cawlcanghnak hmuh tikah ka upat ngaingai hna. Nain, Senthang miphun nih kan in ngeihmi hna University siangngakchia (mino) fimthiamnak a ngeihmi le cathiam sang pawl nih kan miphun party kan dawt hau i, kan miphun party kan tanh a hau tiah ka ruah.

Chinmi nih zeitin dah kanmah te khua kan khan khawh lai le lai kan rel khawh lai timi hi kan ruah le kan tuakchih ding si, miphun dang party Kawl uknak tang ah le Kawl party chung ah kan vaivuan lengmang mi hrim hi khuaruah ngai a hau. Pengtlang dang mino fimthiamnak sang degree a ngeimi nihcun miphun dang Kawl party nakin miphun party an tanh deuh hrimhrim. Zeiruangah miphun caah lungfahnak le zawnruatnak taktak an ngeih caah a si kho ko.

Senthang miphun chung in NLD party le CNLD party candidate pawl zong hi MPs tiang lawng cuanh loin Vuanci dirhmun tiang a phan kho mi zoh sang khawh hna ahcun a tha chinchin hnga? Chin ramkulh chungah NLD le CNLD party pahnih hi mipi nih uar bikmi Party an si. Senthang miphun chung zong in NLD minung le CNLD minung kan um thiamthiam ko lai, vawlei phung a si ko.

Senthang miphun le mipi nih NLD party minung Saya Lian Ceu le Sayamah Iang Tial Hakha NLD EC pawl nih ticket an pek hna lo ruangah kan buai ngai i, kan lung a fak cio ti hmuh khawh a si. Kawlram chung chimh loin, Chin ramkulh chungah NLD party lawng maw an um timi hi (Big Question) biahalnak nganpi a um? CNLD party chung in Senthang minung pakhat khat cu candidate an chuahpi ve te ko hna lai, tiah ruahchannak a um.

Senthang miphun le mipi nih NLD tanh hlei le CNLD tanh hlei hi kan ngeih awk a si maw? Senthang miphun nih kan ngeihmi kan savo constituency (2) kan ngeihmi sungh cu kan duh cio lai lo, keimah hrimhrim zong nih ka duh bak lo 100% ka dirpi bak ve. Asinain, NLD minung an sungh ruangah kan lungfahnak kan phuang cio tikah ruah awk ngaingai thil a um. CNLD party chung in candidate an chuahpi mi ah Senthang minung an itel lo i, a dangdang party zong ah Senthang miphun aiawhtu an kan telhpiak duh lo ahcun kan lungfahnak cu kan chim cio a hau ko tiah ka ruah bak ve.

2020 thimnak caah NLD nakin CNLD minung hmanh nih ticket ngah hna sehlaw ka duh deuh rih. Zeiruangah miphun dang Kawl party nih uk peng hi ka uar lo hlei ah, Kan Chin miphun party ka tanh caah a si ko. Mah le hmuhning party kongah chimhrel khawh a si bantuk in ahopaoh nih soisel khawh le dohkhawh a si ko.

By Salai Van Maung Ling

 187 total views,  1 views today

This function has been disabled for Chin 11 News.