Salai Van Lian Thang: Vai Le Kawl Politics In Him Tuah Hna Usih

𝗩𝗮𝗶 𝗹𝗲 𝗞𝗮𝘄𝗹 𝗣𝗼𝗹𝗶𝘁𝗶𝗰𝘀 𝗜𝗻 𝗛𝗶𝗺 𝗧𝘂𝗮𝗵 𝗛𝗻𝗮 𝗨𝘀𝗶𝗵

(estimated reading time: 5 minutes, 1082 words)

𝗛𝗿𝗮𝗺𝘁𝗵𝗮𝘄𝗸..

▪︎ Saiha MDF party cu BJP ah an lut viar i tulio Mara Autonomous District Council (MADC cozah) cu BJP cozah ah aa thleng

▪︎ Lawngtlai Congress party hruaitu hna cu BJP ah nizan ah an lut ve i nizan in Lai Autonomous District Council (LADC cozah) cu BJP cozah ah aa thleng

𝗔 𝗿𝘂𝗮𝗻𝗴 –

▪︎ Miphun hmete kan si i BJP central cozahpi cahnak le a thazaang bochan in kan ram hi kan hunchoter lai

▪︎ BJP hi central ah cozah tlaih peng dawh asi i anmah sin kan luh ahcun Direct Finance le 8th Schedule amendment (uknak nawl sang deuh) an kan pek lai

▪︎ Aizawl ah a kaimi MNF State cozah le Congress State cozah (Mizo political leaders hna) kan celh ti hna lo i anmah tlaihkhih renghnak tangin luatnak umchun cu central BJP party ah ipeh lawlaw hi asi

𝗞𝗵𝘂𝗮𝗰𝗵𝗮𝗸 𝗹𝗲𝗶…

▪︎ NLD tha kan pek lawngah democracy kan hmuh lai i chawva tangka le development kan ṭuan khawh lai

▪︎ NLD chung um lawngah 2008 phunghram kan remh khawh lai i federal phung le self-determination kan hmuh lai

▪︎ Rawl-hak ei kan za rih lo. Miphun Party ah dir caan asi rih lo. Ralkap dohnak ah NLD ah kan dir caan asi. 2025 hnu leiah Miphun Party ahcun kan um te hna lai

𝗥𝘂𝗮𝗵-𝗮𝘄𝗸..

▪︎ India lei unau Mara le Lai ramkhel khuatuakning hi tulio khuachak lei Chinmi cheukhat ramkhel khuaruah luanning he lawhnak hi a hun um len. Kan hme tuk ko maw? Are we too small to face up to the Vai and Kawl powerhouse!

▪︎ Ram ukhruainak a felfai ngai cangmi le ram a dai cangmi ramah “Development Politics” a khelmi an dirhmun le ram ukhruainak a faifim nemmam rih lomi le miphun zalonnak tawhlanzi a tuah cuahmahmi self-determination a khel liomi ram dirhmun hi an ikhat lo – thleidan thiam hi ahau.

▪︎ Military dictatorship doh lio ahcun hoikawm hna kan rak si men lai. Nain, “constitutional Issue” a phak cun kan hoi an siti lo. Ṭanti thiam asi ti lo. Ka nolh lai: ram uknak phunghram kongkau kan luh ahcun kan ral an si! A dik ning tein chim hi a á¹­ha. Ralkap uknak kan rak dohti lio bantuk kha asi ti lo––ram dirhmun hi aa thleng. Bochoh Aung San nih Mirang komh caan le Japan komh caan kha a thleidan thiam. NLD cozah asi hnu le asi hlan hi aa dang. We have no eternal allies or permanent friends, only permanent interests! Cucu kalpi thiam hi kan hau ve––politics asi hi mu.

▪︎ India Mara le Lai nih BJP an ibochan khi cu BJP central cozah kutah innkaa hunnak “tawhfung” a um caah asi. India constitution a remh khawh. Jammu and Kashmir “special status” hmanh a lakpiak (article 370 of India constitution) á¹­han hna i, an hruaitu thong a thlak dih hna pinah State pakhat kha Union Territory pahnih ah a cheu put ko. Miphunfa tete nih BJP central cozahpi an fuh cu an mawh hna lo. Kawlram cun NLD central cozah kutah tawhfung a um lo, constitutional change a tuah khawhmi a um lo, 2008 phunghram remhnak nawl a ngei lo––Tatmadaw kutah tawhfung hi a um. Kawlram i Chin miphun cu Panglong Agreement minsen thutu le tuni Kawlram Bupi a sertu miphun (Cofounder of the Union) kan si. India um Mara le Lai nih BJP an luh le kan nih NLD kan luhning hi aa khat lo. Kan ram political context zong aa khat lo. Ruah deuh hi a hau..

▪︎ Tawhlanzi a dih i ram uknak a feifal hnuah Laitlang ah Central Party ah a ummi le Miphun Party ah a ummi: National Party vs Regional Party tiah pahnih a dir te lai. Cu tikah “NLD ah um awk asi” an ti ahcun kan el lem hna hnga maw! Tucu a caan asi rih lo. Tawhlanzi tuah lio caan asi. Development politics in kan dohthlennak tu hi an thah sual lai i kan ram le vawlei zong hi chawva le tangka in an lak sual lai ti hi kan ven a hau. “Ram Policy” sernak nawl kan kut a um cun develoment hi cu rang ngaiin a kal ko lai. Thianghlim ningcang tein cozah chawva tangka tawlrel le hman tu hi a biapi ngai.

▪︎ Vai politics muru cu anmah a kungpi ah i siter in miphunfa pawl kha a á¹­engnge a fatete in cheu hna i “autonomy” zeimaw pek hna i anmah akungpi ah ipeh lo le anmah bochan loin an kutke tein dir kho lo lakin le nung kho lo lakin tuah khi asi. Tu khi an hlawh a tling ngai. Delhi ah kal i Vai sinah phaisa hal kha a sangbik khel kawhmi politics ah aa cang. Bia dang cun: kut-dawh lo khawh lo bantuk ah Vai nih khuathlang leiah a kan ser. Vai Politics le Kawl politics luanning hi aa khat nawn. Zeiruangah pohmah §261 hi an remh duh lo? Mahte State cozah ser kho lo lakin tuah i an hnabei donghter cikcek i anmah bochan lo khawh lo dirhmun ah luhter dih khi asi. Phundang cun: tlangmi hna miphun ramkhel thisa thah piak i anmah suaimi policy hruainak tangah kunter khi asi. Cucu bia dang cun: a nemnak in kan ram le kan vawlei lak piak khi asi. Lungfim tein hihi ralrin a hau.

▪︎ “Tuluk i Han miphun, hlan Soviet Union i Russia miphun, Shri Lanka i Sinhalese miphunpi bantuk dirhmun ah a ummi miphun kan si i kannih a fim cangmi le a á¹­hangcho cangmi hna nih nan nih a fim rih lomi le a á¹­hangcho rih lomi miphun hme pawl hi cu kan in uk hna i kan in á¹­hanchoter hna awk asi” timi ruahnak hi cu kan hnatlakpi kho hna lai maw? Lung a fim komi miphun nih an cohlan khawh lai hi zumh a um lo. Kan mipi fimnak hi bochan awk a tlak tuk ko.

𝗕𝗶𝗮𝗱𝗼𝗻𝗴𝗵…

“Kawl le Vai bochan locun kan ram le miphun hi kan ser kho lai lo” timi mah miphun ibochan ngam ti lonak lungput phun Chin mino thisen chungah a luh sual ding hi kan sian ko maw? Hruaitu upa cheukhat cathlah ka rel i apoi ka ti ngai. Nu le pa nih saupi in khua hi kan ruahpi tuah u.

Pathian thawngin mipi le kanmah ibochan in kan ram le kan miphun hi cu kan ser khawh ve ko lai. Vai le Kawl politics in him tuah usih. Miphun ah tizut loin dirti caan asi.

Salai Van Lian Thang

17 October 2020