Salai Van Bawi Lian Nih A Dirhmun a Phuan Dih Cang!

Ramkhel ah ka Dirhmun
(My Political Principle)
******************************
‘ဂုဏ္မက္'(kungmat) pawl khi kan uar cio hna lo. ‘Suingun, chawva le rumnak’ in mi a tahmi, thleidan le nautat a hmangmi cu kan huat hna. Mirum le chawva ngeimi komh in michuah aa timmi khi dirhmun ngei lo an si. Midang sinak, thiamnak le rumnak in dirhmun ngeih cu caansau an nguh lo.

Mah sinak, dirhmun te in ‘kamlo’ tiah aa zuam, lungfahnak a ngei mi cu an hlawh a tling. Hawi zong an lonh khawh hna. An i zuamnak in an hmuhmi, an thiammi nih ‘dirhmun’ ngeitu ah a ser hna. Cu bantuk pawl cu caansau a nguhmi an si. Midang suingun le chawva in dirhmun aa sermi an si lo. Thiamnak le fimnak in aa sersiam mi an si i an hmun zungzal.

Ramkhel zong cu bantuk a si. Chin miphun cu kan si a faak, midang nih nehsawh, thleidan le namneh kan tong. Thleidan, namneh le nehsawh kan tonmi dir-onh le tei ding ah Chin miphun — mah le mah i bochan in ramkhel tlukruannak, thanchonak covo hmuh ding ah Chin Party in ramkhel ka lut. Midang he aa ruang in thanchonak covo, ramkhel tlukruannak, dikfelnak (justice) kan tinco hrimhrim a herh. “Dinfelnak le Tanruaknak’ in kan i zuam ahcun kan hlawh a tling lai.

Miphun sinak in ramkhel, thanchonak le nuhrin covo vialte ah thleidan kan ton mi hi — Midang ‘kat’ (bochan) si lo in – mah miphun zumh le bochan in kan dir-onh a a herh. “A sungh pek lo in aa zuammi miphun le minung” cu an hlawh a tling. Cu bantuk zuamnak in a hlawhtling mi miphun, ram le minung vawleicung ah an tam tuk.

Midang “kat” (bochan) in dirhmun ngah cu caan sau a nguh lo. Hmuh hmanh ah atak (အစစ္) a si bal lo. Chin miphun hmuihtinh le duhmi taktak cu Chin mi lila lawngte kan lak khawh, kan ser khawh. Cu laknak ah “ramkhel” celh kan thiam lai. A thurhnawm mi si lo in “a dik mi” (fair game) kan i celh lai.

Cucu Chin Party ka luhnak a ruang le Chin miphun ka dirpinak alam (political principle) a si. “Dinfelnak le Tanrualnak’ in kan i zuam ahcun Pathian nih teinak a kan pek hrimhrim lai.

“Midang bochan in dirhmun i ser hna hlah usih. Miphun ramkhel le tlukruannak caah dirhmun fek kan ngeih, kan i zuam ahcun miphun dang upat mi, bochanmi le tanpi mi ah kan i chuah ko lai”

Salai Van Bawi Lian (Martin)

 169 total views,  2 views today

This function has been disabled for Chin 11 News.