Salai Ngun San Aung Hi Upat A Tlak, Pasal Tha Taktak A Si!

Salai Ngun San Aung he Fb ah bia kan i al pah tawn, fak nawn kan i sik caan zong um ko. Nain, tutan ralkap uknak doh ah raltha taktak in Hakha mino an hmai bik a dir ngam zoh tikah upat a tlak, pasal taktak a si.

Relchih Dingmi: UN zung ah Myanmar cozah aiawhtu Kyaw Moe Tun a biachim ka zoh i ka mitthli he kai ciah ve ko, thaizing lei lam zawh ding zong thazaang thar aka pek. UN aiawhtu pakhat nih vawleipi theih in UN zung bak ah ralkap uknak lakmi a dik lo, aho poah nih ralkap uknak kan doh i rianrang in kan thah colh a herh, 2020 election ah teinak a hmumi NLD sin power pek than a hau, UN nih zeiti lam hmanh in ralkap cozah theihpi ding a si lo tiah a chim.

A donghnak ah Kawlholh in a chim chih, ‘rammi dihlak nih hmun kip ah lungrual ngai in ralkap uknak nan doh caah kai lawm, tutan dothlennak kan tei hrim lai(အရေးတော်ပုံ— အောင်ရမည်)’ tiah a kut in CDM tanpinak langhter buin a bia a donghter. Vawlei cung zung sang bik a thumi Myanmar cozah aiawhtu hmanh nih Min Aung Hlaing kaltak in mizapi dothlennak ah ai tel ve cang. Lung a hmui taktak. MAH cozah cu a tlu colh ko cang lai.

Relchihding: CDM ah ai tel ngam rih lomi cozah riantuantu hna an hmanthlak Facebook ah tar in thangchiat khi a dikmi a si lo, a phung zong a si lo. Ngol cang u sih. An i tel ve nak hnga a nemnak tu in sawm ko u sih.

An i tel ve rih lo khi ralkap uknak an duh caah a si bak lai lo, kanmah tluk in an huat ve ko lai. Nain an pawcawmnak rian an sung lai an phang. Cozah rian ngah a har tuk, an pawcawmnak a si, mizaw a ngeimi cheukhat caah cun nunnak bantuk a si. Kaltak ding a fawi bak lo, mah ruang ah CDM ah aa tel ciami upat an phut nak cu a si. All Credit: Salai Lungthil Tum