Salai Lungthlitum Lawmhpi Cio U Sih! A Tha Tuk!

Ka pate a chunmang a tling ve cang lai
=============================
Lah-wah-kah rian a tuanmi ka pate hi Hakha an umnak kum 20 leng a si cang, thlakhat 200,000 hrawng lawng a hlawh a si. Khua kip ah cozah nih an thial lengmang. A nupi le fale cu Hakha deuh ah an um.

‘Hakha cu inn pakhat ah ting thongkhat cung lawngte a si cang, innhmun pakhat ah tingza tang man a um ti lo. Kanmah hna nih kan chan chung Hakha inn kan ngei kho te hnga maw?’ tiin lungdong ngai in aka ti tawn.

England ka kal hlan Yangon ka um lio 2013 ah amah rian a tuannak Hledan(Kamaryut) lahwahkah zung ah a thli tein aka umter. Zaan ah a fale pahnih he riantuannak cabuai kan peh i ihkhun caah kan hman. Chun ah inn tin khawh a si lo.

A hnu ah cun a riantuanti hawi nih zung ah ka um ve timi an theih tikah ka pate an sik, ‘um ngah ti lo’ an ka ti. North Dagon um kan khuami Saya Kham Cung Nung sin ah a rak ka chiah than. Inn ngei lo lawng si lo, apartment taihkhan hmanh hlan khawh rih lo caan kha ka vun i theih than.

Nain, nizaan Chinram cozah nih innhmun an pekmi min cazin ah ka pate a min ka hmuh, a pa min ‘Dar Kung’ tiah TCP chimtu nu nih ka pu min a vun chim. Keimah nih ka ngah rua ti tluk in kai lawm ve.

Cozah nawlpeknak um loin le upadi he ai kalh in inn an sakmi pawl cozah nih an theh piak hna caah soisel an rak tong ngai, nain atu cu kei ka pate telh in inndong 400 leng nih Hakha innhmun an ngei cang. Pek rih lomi a tam tuk rih, inndong 1000 leng pek khawh an si te lai. Innhmun tam deuh hi ting 50 tang an si.

Cozah nih hizat innhmun manfawi tak in mipi sin a pek hna caah Hakha innman le innhmun man cu duh zong duh lo zong ah ceilak a tla lai. Zaran zong nih inn le innhmun kan cawk khawh ve cang lai tinak a si.

 219 total views,  1 views today

This function has been disabled for Chin 11 News.