Salai Lungthli Tum Nih Pu Lal Maung Cung Kong A Tial Mi Te Cu Ngaihchia Zong A Si Pah

By Salai Lungthli TumĀ 

Hai thei ttawh caan a phak ah mileng le mithar nih a zohkhenhtu pa an thawl

+++++

Haikung zohkhenh ding ah khuabawi nih khuami pakhat tuanvo a pek, amah pumpak thilri bantuk in a dawt i a sining dihlak le a caan vialte pek in a zohkhenh. Midang zong nih an bawmh tuk lem lo, amah thazaang deuh hmang in kum 10 leng a zohkhenh hnu ah haikung cu a thei a vun tlai ve cang.

A thei a tlai tikah ‘nangmah covo a um ve lai’ tiah khuabawi le khua upa hna nih bia an rak kamhmi a si. Nain, ttawh caan a phak lio ah amah nak thawng deuhmi pakhat nih ‘nangmah ttawh ding haithei hi kei nih ka tawh ko lai, kei ka thawng deuh hih, nang cu na tla sual lai i midang nih an kan tawh khenh sual lai, kei cu ka nganh kho lai lo’ tiah a rak hal ve.

Haikung zohkhenhtu pa nih ‘hmundang ah tawh ding haithei a tampi ko tung, nangmah a thawng deuhmi na si caah hmundang ummi na kal hnawh ko lo? Keimah kai hammi thengte cu ka chut hram hlah law’ tiah voi tampi a nawl chih. Pathawng pa nih hmun dang ah haithei va kal hnawh cu a ngamh ve lo i a thazaang le a larnak hmang in hramhram chuh a timh. Hai zohkhenhtu pa nih a duh ve lo i an buai, innpa tiang nih theih dih a si.

Pathawng pa nih cun an chungkhar zong a si lomi tlangval tam nawn a sawm hna, haithei a hmin hnu lawng ah an chungkhar ah a lutmi pawl zong a sawm chih hna, amah lei ah an tang dih.

Pathawng pa cu biachim a thiam fawn caah innpa vialte hmai ah amah cu ‘midingfel’ ah ai canter khawh, nain a chung muru in a rem lomi haikung zohkhenhtu thawl khawhnak lam a kawl chih. Pathawng a si, biachim a thiam fawn caah khuabawi pa nih a tih deuh, pathawng pa lung ton duh ah khuabawi pa nih haikung zohkhenhtu pa kha an khua in a thawl diam ko.

Thawl a tongmi pa cu a lung a fah tuk caah zoh dawh tein a um thiam ti lo, ngakchia bang zohchia ngai in khua chung ah a aukhuang i innpa zong nih zaangfak awk a tlak lo tiah an zoh sawhsawh ve.

Note: Pu LMC a uarmi ka si bak lo, nain an pathawng pawl nih an aa-na, an larnak, an thiamnak hmang in an nek ning le uico bang an thawl ning zoh tikah zaangfak ngai cu a si

 181 total views,  1 views today

This function has been disabled for Chin 11 News.