Salai Lungthli Tum Cu No Thang Kap Hnuin Saya Rung Kaw Leiah Ai Thial Cang

Salai Lungthli Tum nih pupa loram kong a tial mi ah hin an soisel ngai mi a si. 

Hnaring le Khuahrang ram cu bawi chungkhar ram a si lo, khuami dihlak an ram a si

====================================

Hnaring le Khuahrang ah bawi chungkhar le khuami kar ram kong buainak a um lengmang. Bawi chungkhar nih ‘kan pupa ro’ an ti i ram kau taktak cu ‘kanmah ram a si’ tiah an kulh dih. Bawifa a si lomi zaran caah cun lo tuahnak hmun zong ngah a fawi ti lo, taza i cuai lengmang a si.

Voidang ah cun lo tuah duh tikah khuabawi sin ah lohmun hal a si, nain atu ah cun bawi chungkhar sin ah phaisa in hal an hau cang. Vei party ruang ah ramukbawi chan kan kir than, a poi hringhran dah!

Vei party CNLD phu cu pupa ram le pupa ro dirhkamh hi an policy lakah a biapi cem ah an chiahmi a si. Hakha ah lih hrokhrol in ‘ram ngeitu ka si’ aa ti i cozah a dohtu hakkau phu zong fek tein an rak dirhkamh hna.

CNLD candidate Saya Rung Kaw zong pupa ram le pupa ro a tanpi ngaimi a si. Hnaring ah a chiahmi a agent pa hi Hnaring bawifa a si, ram kong ah Hnaring khuami tampi he taza aa cuai cang. A nupi zong Khuahrang bawi fanu a si, a nupi a pa cu Khuahrang khuami tampi he ram kong ah taza aa cuai ve cang.

Hnaring le Khuahrang bawi chungkhar cu Saya Rung Kaw le a party CNLD nih an kan dirhkamh lai an ti i an i lawm tuk, Saya Rung Kaw caah biatak tein an cawlcang. Saya Rung Kaw le CNLD lawng vote pe u an ti. Nain, bawi chungkhar a si lomi khuami tam deuh cu an thinphang.

Kei ka dirpi zungzalmi policy cu kan ram hi minung pakhat or bawi chungkhar nih an ngeihmi a si lo, khuami le Laimi dihlak nih kan ngeihmi a si, Hnaring ram cu Hnaring khuami dihlak nih ngeihmi a si, bawi chungkhar an ram a si lo, bawifa le michia fa timi a um ti lo, mipem le mihlun zong kan i khat, minung vialte kan i khat dih timi hi a si.

Chinram cu Kawlmi an ram a si lo, bawi chungkhar an ram zong a si lo, Chinmi dihlak kan ram a si. Khuahrang ram cu Khuahrang khuami dihlak an ram a si, bawi chungkhar an ram a si lo.

Catialtu: Salai Lungthli Tum

 128 total views,  1 views today

This function has been disabled for Chin 11 News.