Salai Lungthli Tum Catial Mi Ah Dr. Sui Chin Nih Aleh Mi Te Hi Ka Uar Tuk E

Note: Salai Lungthli Tum nih a tial mi hi na rel hmasat lo ah cun Dr. Sui Chin catial mi na fiang sual lai lo. Atanglei ah Dr. Sui Chin nih Comment a tial mi na hmuh lai.

In-Depth Analysis: CNLD Party Caah Chin Cozah Ser Khawhnak Lam A Um Taktak Maw?

1.  Chinram Hluttaw ah MP hmunhma 24 a um i cozah ser ding ah MP 13 tal a hau. Ralkap 6, CNLD an thawn lonak Tedim 2 le Tonzang 2 zuh ahcun i cuh ding 14 lawng a tang. Zeiti lam hmanh in CNLD nih 14 chung ah majority MP 13 an hmuh khawhnak ding lam a um rih lo.

2. Majority kutka ai khar hlei ah 2008 Constitution nih president kha chief minister thimnak nawl a pek. CNLD party cu president an sinak ding lam a um lo caah chief minister thimnak nawl an ngei kho lo. Cozah ser or CM thim khawhnak ‘tawh’ cu party ngan NLD or USDP bantuk lawng nih an ngei rih, pohmah 261 nih a bawmh hna.

3. 𝐅𝐨𝐧𝐡 𝐜𝐨𝐳𝐚𝐡(𝐜𝐨𝐚𝐥𝐢𝐭𝐢𝐨𝐧): Pu Ngaisak nih ‘NLD hi anmah tein rampi cozah an ser khawh lai lo caah tlangmi party an kan sawm te lai, cutikah chief minister, Hluttaw speaker le vuanci hmunhma kan hal ve lai’ tiah a chim.

A chimmi a dikmi a lo ko. Nain, a taktak ah a si kho lomi khi a si. Aruang cu…

–Tlangmi party 40 leng an um. An thazaang, an i tinhmi le an duhmi ai dang cio. An policy ai khat dih lo caah tlangmi party vialte khi party pakhat bantuk an tanti khawhnak ding lam a um lo, a taktak ah a si kho lomi a si.

𝐓𝐥𝐚𝐧𝐠𝐦𝐢 𝐩𝐚𝐫𝐭𝐲 𝐟𝐨𝐧𝐡 𝐔𝐍𝐀 vs 𝐍𝐁𝐅: Tlangmi party tampi fonh in sermi coalition phu pahnih(UNA le NBF) an um. UNA hi Shan party ngan bikmi SNLD, Zomi party etc. an i telnak a si. NLD he hawikom an si. NBF cu Shan party SNDP, Pu Zozam le Chinchin Pekthang phu an i telnak a si–2010 election ah thimnak a lutmi phu an si.

Phundang chim ahcun NBF phu cu NLD nakin USDP le ralkap he ai hawikom deuhmi an si.

NBF le UNA ah a lut lomi party tampi an um ve, an duhmi le an tinhmi ai khat cio lo caah an luh lo hi a si.

𝐍𝐋𝐃 𝐧𝐢𝐡 𝐌𝐏 𝟑𝟑𝟑 𝐧𝐠𝐚𝐡 𝐥𝐨 𝐝𝐢𝐫𝐡𝐦𝐮𝐧: NLD nih cozah sernak a herhmi MP 333 hi ngah kho sual hlah sehlaw tlangmi party dihlak a sawm hna lai lo. MP tampi zong an herh te lai lo. A sawm ding party cu an hawikom thing SNLD le Zomi party bantuk khi an si te lai.

–Suu Kyi le Aung San doh le soisel, Kawlmi huatnak karhter in MP tlin ai timmi party pawl khi cu NLD nih a sawm hna nak ding lam a tlawm ngai.

–NLD hi tutan thimnak ah cozah power an ngei chap cang caah 2015 nakin an thawng deuh kho. Kawlmi region 7, Kayin, Kayah, Chin, Mon, Shan le Kachin lakah USDP power a zor cang caah NLD an thawng deuh lai tiah zumh a si. MP 333 cu fawi tein an ngah ko lai tiah tampi nih an zum, ngah lo khawh zong a si ve.

–NLD nih tlangmi party a sawm sual hna zong ah Pyine Hluttaw i majority a ngeimi party lawnglawng chief minister an pek hna hnga. Party poah CM pek ahcun Shan ah cun CM 5 leng an um a hau hnga. Majority a ngei lomi party cu ‘chief minister’ pek phung hrim a si lo, hal phung zong a si lo.

Cucaah, Chin state Hluttaw ah MP majority hmanh a ngah kho lo ding CNLD party nih ‘cozah sernak nawl le chief minister kan hal lai’ an ti ngam khi mipi hlen phunkhat a si.

Dr. Sui Chin nih a comment a pek mi a si:

A ngaingai ti ahcun 2008 constitution hi indirect in NLD nih tha a pek. Constitution a remh Duh lonak zong NLD le ralkap hi a chung tein an ithit um ruangah asi. Tlang cungmi power tleih an duh I Chief minister zong anmah nih thudir an tuahter khawhmi NLD cu an pek.

Tlang cungmi party nih Ram then ah a tei ahcun tlang cungmi party le power control an tuahnak caah key an isermi asi. Development lawng in zoh ahcun an policy hi a thami a lo. Asi nain ASK zong nih tlang cungmi dolhnak ding policy hi a chung in a tleih.

Kawl ralkap nih a tukmi Ram vialte zoh uh. Development cu kum hra chung tuah cangmi zong nikhat ah an Duh cun an hrawh dih khawh. Mah an key hi kan in herh hna lo tiin a hrawk khomi leader lawng tlangcung mi nih kan herh. Millions ting Million pek hmanh in hi policy hi cu ka vote hnga lo. Mah le hmuh ning cio.

 438 total views,  1 views today

This function has been disabled for Chin 11 News.