Salai Lal Than Cuang@Cuang Bik Chin Affairs Ministry In MP A Cuh Ve Lai

Salai Lal Than Cuang’an a ma mimal atang (Party a tang ni lovin) C.A.M cuh a tum thu cu Chinlung Today chuan tihian a sawi.

Independent In Salai Lal Than Cuang In CAM Cuh Ding

Rampi hrilawknak 2020 November thla ih tuah ding mi ah zo party khal kop lo, Independent in Salai Lal Than Cuang@Cuang Bik in Kalay-Kabaw CAM a zuam ding thu theih a si.

Chin miphun si ruangih sun mi pawl sualsuak a ṭul thu, Legal equal right ngah thei ding, zirnak ṭha ngah, pursum leilawnnak ah hamṭhatnak tuah a ṭul ruangih CAM cuh a tum thu theih a si.

Party dang khal kop lo in independent ih CAM a cuh tumnak hi party feeling um lo, ruling party le party policy ih hnaihnok lo in zalen zetih miphun hrang hnaṭuan, a tul dandan in ruling party siseh, opposition party thawn hnaṭuan tlang thei a duh ruangah a si. Party policy (Tricks) pawl ruangah zalen zetin hnaṭuan thei lo a phan ruangah direct ih mipi hril tlin theihnak post a cuhnak a si.

Salai Lal Than Cuang hi Rev. Lal Piang Thang le Pi Khaw Lian Ruat tei fapa 3nk, Sekan khua ah a suak ih Insein, Yangon ih um a si. Tu ah Falam Pawlpi Mino, Yangon ah President le Myanmar Council of Churches (MMC) ah mino Chairman ṭuan rero lai a si. Zirnak lam ah M.Div, LLB (4 year) a si.

Kalay-Kabaw ih Chin Affairs Ministry (CAM) cuh tum theih zo mi ah CNLD ihsin Pu Khaw Tuah Lal, Pu Bual Hnok, Pu San Thawm an si. NLD ihsin Pu Lal Thawm Thang (Tui ṭuan lai), Sayamah Lal Rin Muan, independent ihsin Salai Lal Than Cuang an si. Party dang ihsin theihfiang mi a um hrih lo.

Catialtu: Salai Medal-Pui Tuallawt Emem

 211 total views,  1 views today

This function has been disabled for Chin 11 News.