Salai Bawi Lian Mang: Nai Hrawng Kan Boruak

Nai hrawng kan ram boruak cu Ka hawi pa nih khuathar I a pu pa kong a ka chimhmi ka lung ah a chuak ngai.
Hiti hin asi;

Ka pu pa pakhat hi ralkap a rak tla I a tar hnu ah pension in a rak tlung. Ka pu ralkap na ttuan lio ah khan sen zeizah dah narak hmuh tiah kan hal I “Aize, sen tham cu puanchia an tthit mi asi ko I a duh ah an kan benh, an duh lo ah an kan dawhpiak kolo hlah i, an lung katon deuh hna poh ah an ka benh, an lung ka ton hna lo poh ah an ka dawh tthan I, an ka benh mi dihlak fonh ah cun sen kua-hra cu asi hngalo ma, na in mu pension ka lak ah cun sen khat te a tang I mah te he cun karak tlung ko hen cu” tiah a kan ti e ati.

Nai hrawng kan ram I kan pi asi ning zong hi ka hawi pa nih Khuathar a pu kong a ka chimh mi he ai lo pah thulh tiawk in a um. Mintthatnak an pek mi pawl ramkip in pakhat hnu pakhat an dawh piak.

Thir kuttum le meithal he rampumpi kawl ralkap nih nawisen hnuk in an rak kan rial lio ah nemte in a rak dohhna. Kanpi I dothlennak a tuah mi le a dirhmun cu Burma ram pumpi zapi zaran nih kan duhmi dothlennak le kan dirhmun a rak si kha vawlei pi nih an rak kan theih pi.

Burma ram chung mizapi kha vawlei pi nih kan in dirkamh hna ti mi hlemchunh nak ah kan pi cu mintthatnak pa khat hnu pakhat an pek. Khuangcawi in an cawi. Cucu Burma ram mizapi nih democracy le zalonnak le nuhrin covo kan duhnak kha kan in ttanpi hna ti nak asi.

Cu bantuk in Burma ram si ning le democracy le nuhrincovo kan ttam nak le kan hal nak cu vawlei cung ram kip le khuakip ah a rak chimrel tu tete le a rak au pi tu tete an rak um caah asi. Keimah zong Canada I sianghleirun karak kai nak ah kan pi hi mintthatnak nan kan pek piak asi ah cun Burma ram pumpi nan kan ttan pi bantuk asi lai tiah “Student Government” (Karak kai nak sianghleirun ah hin Student Union tiah midang nih an auh tawn mi kha Student Government tiah kan auh) sin ah ka rak chimrel bal ve. Kei mah ka chim rel thawng cun a si lai lo na in kan siangin nih cun mintthatnak honorary doctor degree an rak pek. Cun karak um nak khua zong nih honorary citizen an rak pek chap fawn.

Sianghngakchia lak ah, mipi lak ah, cozah sin ah ai rem nak poh ah Kawl ralkap cozah nih thlennak a tuah a hau, NLD le Tlangcung mi hriamtlai pawl he thumkomh chonh nak a tuah a hau, politics ruangin a tlaih mi hna thong chung in a chuah hna a hau ti bantuk kan ti khawh tawn kan rak au, kan rak chim peng ve.

Can zeimaw zat a kal hnu ah I chonhbiak nak tete zong cu a hung um, political ruang I thong an thlak mi hna zong cu an vun chuah hna. A hlan I thongtla pawl kha cozah an hung cang.
A mah belte kan pi Politics I a luh hnu in a dirhmun an zoh tik ah an lung a tong rua hna lo. A rak ttanh bik tu ram ah ai tel mi Canada ram cu a tu ah cun a soisel tu bik ram ah ai cang. An pekcia mi degree pawl tu cu an chut tthan rua lo dah.

A ho hmanh nih hi zapi lung ton khawh taktak cu a har korua. Ralkap uknak cu kan duh hrimhrim lo caah Democracy cu kan ti peng nak asi. Miphundang nih uk le pen kan duhlo caah Federal kan ti pengnak cu a si fawn.

Aho he hin dah cu democracy le Federal cu kan ceih tti khawh deuh lai vun ti ah cun Kawl ralkap a si lo mi, civilian party pawl cozah an si ah hin kan lam a tluang deuh ko lai.

Naihrawng thil si ning zoh tik bel ah kan kan kuih tik I sa kan dum mi kha kan bawh nak lei chuak lo in a kan sulh sual ah cun mah le mah ikah le ihliam sual a fawi bantuk dirhmun hna kan phan hlah maw ti awk in a um pah. Kan ruah lo ning tuk in Sa nih a kan sulh tik ah kan mah le kan mah kan ihliam. Kan mah le kan mah fak tuk in kan ihliam tik ah mi lung kan tong lo. Mi lung kan ton lo tik ah an lung kan ton lio hna I an rak kan benh mi sen cu pa khat hnu pakhat an kan dawh piak.
Nai hrawng kan boruak cu khuathar ka hawi pa apu ko kan lo.

Cridit: Salai Bawi Lian Mang ( CHRO )

 

 439 total views,  1 views today

This function has been disabled for Chin 11 News.