Salai Bawi Lian Mang: 2023 hi dohthlennak lei ttang pawl kan caah kan pangtthat kum asi lai

Salai Bawi Lian Mang: 2023 hi dohthlennak lei ttang pawl kan caah kan pangtthat kum asi lai
2023 donnak;
2023 hi dohthlennak lei ttang pawl kan caah kan pangtthat kum asi lai.
Zeica tiah, SAC nih tuchun Independence day an tuah nak ah vawlei pumpi ram 3 lawng nih lunglawmh pinak ca an kuat hna.

Union of Burma hi vawlei cung ram 125 he diplomatic pehtlaih nak kan nei ti asi I cu vialte lak ah ram 3 lawng nih dotla in an lawmh pi hna tik ah zapi nih dotla ah an ruat ti hna lo timi a faing chinchin.

Cun naite kum a liam laite ah UN Security Council nih Burma ram kong ah biachahnak “resolution” a thlak. Kum tampi chung kan rak izuam lengmang mi New York ah kan rak kal hnawh lengmang mi UN SC ah vote an thlak poh ah Russia le China nih ralhrang an rak dirkamh lengmang mi kha atu ah cun an dirkamh ti hna lo.

Cu chinchap ah USA cozah nih an mah an ram runven nak phunglam an ceihmi chung ah Burma Act cu Congress nih phung ah an ser I President nih min athut.
Cu thil pa hnih UNSC le USA hna nih thil pipa Burma ram cung ah biakhiaknak an tuah mi cu CNF zong nih lunglawm te in donnak le rian kan ttuan ti lai tinak ca thanh tuchun January 4 ah an chuah.

Kumthar rian ka vun luh hmasa cem ni ah CHRO le Vawlei cung ram pical an I kawmhnak bu pakhat asi mi hna cu rian kan ttuan tti lai tiah hnatlak nak min kan thu. Cu kan hna tlak nak ning in Chin ramkulh chung peng pa kua ah Mizaw thlopbul nak lei ah pahrang nei luhlinh in a ttuan mi “health professional” sibawi le nurses minung 200 leng nih minung ting hnih kum khat chung ah thlopbul nak ding rianttuan tti nak asi.

Kan va chimrel khawh mi a pelpawi te kha tthate in an kan ngaih piak I, dawtnak, zawnruahnak le abik in zumhnak an kan neih I phaisa tampi atho tu hna ram pawl an cung ah kan ilawm. Zeica tiah kan ral asi mi SAC ralhrang kha an hnon hna I kan mah tu kha rian ttuan tti ding in an kan zumh deuh caah mah cu teinak hmelchunh nak asi tiah ka ruah.
Ralhrang hi mipi nih kan hnon hna, vawlei pi nih an hnon cuahmah hna. Kan tei cuahmah hna.

2023 hi mipi kan pangtthat kum sihram she.
Kan mipi an kan vengtu le sining vialte kaltak in mipi lei ah a dirmi CDM pawl vialte upat pek bu in.
Kan ttang ttualmal rih lai, kan tei hrimhrim lai. Kan Khuazing le kan Pathian nih kan duhnak rak kan theih piak hram seh.Crd… Salai Bawi Lian Mang