SAC ralkap nih Chin Christian University (CCU) siangakchia pahnih cu Rero tiva pawng ah an tlaih hna

CCU siangakchia pahnih Caretaker ralkap nih an tlaih hna, an thawng theih a si rih lo. July 31 ah Caretaker (SAC) ralkap nih Chin Christian University (CCU) siangakchia pahnih cu Rero tiva pawng ah an tlaih hna i an thawng theih a si rih lo.An tlaih mi hna hi Aung Thang (B.Min) le Robin San (M.Div.) an si, tiah kan theih.

“Matupi Peng, Thlangpian khua lei ah tiva a kal. An rak kir lei July 31, zaanlei sml. 2:00 hrawng Rero tiva pawng ah Caretaker ralkap nih an tlaih hna i atu tiang an thlah rih hna lo. Khoika lei an kalpi hna ti zong kan theih khawh lo ca ah chungkhar le Khrihfabu nih kan thinphang ngaingai. Thlacamnak in kan bawm hram u,” tiah min langhter lo mi Pastor pakhat nih The Hakha Times ah a chim.#Crd Hakha Times

Relchap; Ralhrangbu nih uknak an lak thla 6 hnuah SAC in Caretaker Government ah; Ralhrangbu nih 2021 February 1 rampi uknak a lak hnuah Kawlram hruainak dingah State Administration Council (SAC) a dirh i, rampi nawlngeihnak pathum Executive power, Legislative power le Judiciary power vialte Min Aung Hlaing kut ah pek a si hnu thla ruk ah ‘caretaker cozah’ (inn hngak cozah-အိမ်စောင့်အစိုးရ) ah thlen a si tiin nihin August 1 ah ralhrangbu nih a thanh.

Inn hngak a cozah vuanci-chok cu SAC chiarman Min Aung Hlaing a si lai. Duh-vuanci-chok ah SAC vice chairman, pyidaungsu vuanci pawl, Attorney General (sitne chok) le cozah zung i permanent secretary a si lai tiah thanh a si.

Ralhrangbu nih nawlngeihnak a lak le cangka in ralhrangbu uknak duh lo in mipi tampi nih duhlonak an langhter i nunnak a liam mi le an tlaih mi zong tampi an um. A tutiang lamzawh hi a dai khawh taktak rih lo.

Ralhrangbu tangah riantuan a duhlo mi cozah riantuan le force lei riantuan tampi nih CDM an tuah caah SAC min in thla 6 chung an kalnakah chawlehnak, ngandamnak, fimcawnnak rian pakhat hmanh a kalpi taktak khawh lo caah Min Aung Hlaing nawlngeihnak a cah khawh deuhnak caah Newin lam zulh in ‘caretaker government’ (အိမ်စောင့်အစိုးရ) in a let.

Ram rian rianrangin a kal khawhnak ding caah pengkulh le ramkulh council hna cu pengkulh, ramkulh cozah bu ti a si lai i, vuanci chok le minister hna vuanci-chok, vuanci 6 le attorney general tiin form a si.

Ralhangbu cathanhnak hi rampi hruai ning, pengkulh le ramkulh i hruai ning hna a thlen hnuah Erawady, Thanithari le Sakaing pengkulh RAC chairman hna cu an rian in dinhter an si.TCP