Tanintharyi Township, Dawei Pengkokh Thayat Thayet Chuang khua ah TYC -PDF le SAC ralhrang kahnak a chuak i mah an i kah i a fak ngai ngai tiah theih a si. Ralhrang lei in minung6 an thi i 3 an hliam hna tiah theih a si. Nihin an i kahnak ah hin PDF pawl a thimi le a hliam mi an um lo tiah Dawei mipi vengtu DPDA nih an tar.
Mah Kahdohnak ah hin civil inn pakhat a kang tiah theih a si. Cu lawng si loin phaisa ting 12 le facang bag 2 an chuah manh tiah an tar chih.
Relchap:Hakha, Nazareth Sangmi Cheuchum Hmundang ah an i Thial Hna
———
Zaan 4 chung SAC ralhrang bomb le meithal kuan nih thinphang thlalau in a chiahmi Chin-Oo-Sii, Nazareth sangmi cheuchum nih nihin ah an inn an chuah tak i hmundang ah an i tthial hna, tiah thawng kan theih.
Zaan 4 chung thinphang in an um pin ah nihin chun sml. 2:00 ah an i kap lai timi thawngpang a len caah an inn an chuahtak hna hi a si.
Nazareth sang upa pakhat nih, “Suimilam pahnih hnu in an i kap lai tibantuk in thawng diklo a leng i mipi an lau. Zaam an i tim lo nain inn tam deuh cu zaan lei sml. 2:00 hnu in an i tthial pah dih hna. Zaam ding a si lo tiah kan ruah ko. Kan zaam tik ah ralkap pawl an lawr lai i kan inn kan lo an him lo. Nizaantihni zong ah tawh an hrenhmi inn pakhat ralkap nih an bauh i Laithil kuang khat an lakpiak hna,” tiah a chim.
Nazareth sang ah a ummi pastor pakhat nih, “Nihin chun sml. 2:00 hlan ah SAC ralkap nih chuak dih uh a kan ti timi thawngpang a leng. Nawlpeknak catlap ngaingai cu a um lo,” tiah a chim ve.
“Abikin, Mara biakinn rii in thlanglei hi cu inn a lawng pah dih ko. Inn chuahtakmi hi inn 40 hrawnghrang kan si lai. Zaan 4 chung meithal kuan le bomb nih kan inn pawl a khen tik ah kan him ti lo. Cun, bomb puah thawng le meithal kah thawng hrimhrim hi kan celh lo,” tiah a cunglei pastor nih a chim chap.
Nazareth sang a chuahtakmi hna lak ah Hakha khuachung chungkhar sin ah aa fonhmi an um bang in inn hlan ding in aa timtuahmi zong an um hna, tiah thawng kan theih.
The Chin Journal
September 10, Hakha
Leave a Reply