SAC Ralhrang Rual An Phomh Hna Minung 5 An Thi

SAC Ralhrang Rual An Phomh Hna Minung 5 An Thi

Sagaing ramṭhen, Khin U peng ni chuahlei ah rallamsial ding in a chuakmi SAC ralkap hna cu March ni 1, chunhnu ah tualchung hriamtlai Khin U Specialforce Organization -KSO nih bomb hmanhhnawh in an doh hna tiah theih a si.
Khin U peng nitlaklei Tayatpinsu khua ah zaan thum a riak i Yadaw khua ah rallam sial ding in hmai ah a chuakmi SAC ralkap minung 10 cu bomb puahhnawh in kan doh hna tiah KSO phu sin in theih a si.

“Kanmah sin an ratnak hi zarh khar hrawng a si cang, Tayatpinsu khua in Yadaw khuachung luh ding ah ke in rallam sialtu hmaikal minung 10 cu mine hmang in kan doh hna, SAC ralkap 5 an thi. A taangmi ralkap 5 le bawmtu thlahmi ralkap tiin an kan kulh i an kan kah caah kanmah lei zong cikhat cu pehtlaihnak kan i tuah kho hna lo nain hliamhma tuarnak um loin hnu kan tolh kho” tiah Khin U Specialforce Organization -KSO phu in ṭuanvo ngeitu pakhat nih a chim.

Khin U peng ah SAC nih Martial Law a thanh hnu ah khuate lei cu nitin ti ngawt in rallam an sial i khuachung an kan luhhnawh, hriam ngan hriam hme hmang in an kan kah tiah tualchung mi nih an chim.
Ayeyarwaddy_Times

Relchap>>>>>SAC hruainak in Myanmar ramchung ah nuhrin covo phung an buarnak kong ah Asian ram hna nih hmalaaknak tuah cio ding in Malaysia vuancichoh Anwar Ibrahim nih nihin March ni 2 ah a chim.

Philippines ah nihnih chung khual a tlawn lioah Malaysia vuancichoh cu Philippines-Ddiliman university nih an pekmi Honorary Doctor of Laws degree a laak khawh ah daihnak le thildik he chan fatin kan i hruai le kan kalpi a hau tiah a chim.

SAC nih uknak a laak hnu Myanmar ah nuhrin covo phung buarnak an ton tuk caah cu kong ah fak piin hmalaaknak kan tuah a herh, Asian nih zapi hnatlakmi biakhiahnak a thar pakhat kan chuah lai tiah Malaysia vuancichoh nih Philippine President Marcos Jr he an i ton lioah a chim tiah theih a si.
People’s Spring