Chinram kulh Sagaing ramthen Yi Oo peng Phanka khuate mi Mg Khaing Zaw Ko kum 21 cu SAC ralhrang nih september 4 zaan suimilam 8:00 hrawngah meithal in an kah that tiah theih a si. Cun khuachung minung 3 zong SAC ralhrang nih hin an hruai hna tiah khuami pawl nih an chim. SAC ralhrang nih an kah that mi pa Mg Khaing Zaw Ko cu a ruak tlamtlin tein chungkhar hna nih an lak khawh tiah an chim chih.
Relchap:Kawlram chaklei hawikom hriamtlaibu 3 a si mi AA, MNDAA le TNLA hna nih covid le kahdohnak ruangah Kawlram mipi harsatnak ruah in ralkap cawlcanghnak vialte ngol cio dingin nihin September 4 ah cathanh an chuah.
Cathanh nih a langhter ningah ralhrangbu nih February 1 ah rampi uknak a lak hnu dai tein duhlonak a langhter mi hna cu ralhrangbu nih an thah hna, an tlaih hna ruangah ramchung hmunkip meithal a puah.Kahdohnak zong a zual.
Kawlram chung covid-19 zawtnak ruangah mipi nunnak tampi a liam, eidin, chawlehnak zong harsatnak tampi an ton pin ah ramchung hmunkip ah kahdohnak ruangah mipi nih harsatnak fak piin an in.
Ralhrangbu nih thazaang tampi an i chap, hriamngan in khua an kah, mipi an tlaih hna, an thah hna ruangah kahdohnak a karh chin lengmang mi a si.
Cucaah, covid-19 runvennak kongah pawngkam ram le vawleicung covid runvennak phu hna he tuanti ding le mipi nih atu nakin harsatnak an ton ti lo nak ding caah rianngeitu vialte nih lam kawl cio ding le mipi harsatnak a pe khomi ralkap cawlcanghnak vialte hrial le dinter dingin pehtlaihnak a ngei mi bu vialte hna sin ah kan in forhfial hna tiah cathanh an chuah.
Ref; WN;TCP
Leave a Reply