SAC Ralhrang Nih Peng Pakhat Mipi Sawhsawh 80 Leng An Thah Hna, Inn 3500 An Khangh Piak Hna

SAC Nih Nawlngeihnak An Lak Hnu In Taze Peng Ah Tualchung Mi 80 Leng Thah An Tong I, Inn 3,500 Hrawng A Kaang
====================
Sagaing ramṭhen, Taze peng ah SAC nih nawlngeihnak an lak hnu in tualchung mi 80 leng thah an tong i, inn 3,500 hrawng a kaang, tiah Taze peng mizapi ukhruainak bu nih nihin January 5 ah cathanh an chuah.

Taze peng khuate 83 in inn 3,474 a ciam i biaknak he aa pehtlaimi inn 9 a kangh pinah sianginn 1 le sii-inn le sii khan 1 zong SAC ralkap nih an khangh i nu pakhat zong an tlaihhrem hnuah an thah, tiah an langhter.

SAC ralkap nih inn an khangh caah Taze peng in minung 15,630 cu umnak ngei loin an um i 18,000 cu ralhrial in an zam, tiah Taze Pah Ah Phah nih an langhter.

Taze peng mizapi ukhruainak bu nih bawmhchanh lo awk a ṭha lomi Taze peng tualchung mi hna cu kyats sing 81,739,200 an bawmh hna pinah Pah Kah Phah sinah ramchung le ramleng ummi hna nih tangka, eidin le thilri an pek hna i tualchung mi zong kan va pekchanh hna, tiah Taze Ah Kah Phah nih cun an langhter.

Taze peng mi hna bawmhchanh khawh nakding ca ah Taze Pah Ah Phah nih ngunkhuai khawlhnak in tangka an kawl pinah bawmhnak kong he pehtlai in NUG he pehtlaihnak an ngei i ramchung ramleng bawmchantu hna he zong pehtlaihnak an tuah, tiah theih a si.

Ramkip bawmchantu bu le cozah a si lomi bu hna zong nih Taze peng ca ah bawmhchanhnak pek an duh ahcun Taze Peng Pah Ah Phah sinah pekchanh dingin Taze peng mizapi ukhruainak bu nih an langhter.

Be the first to comment

Leave a Reply

Your email address will not be published.


*