Rum Na Duh Ahcun Hlawhlang Rian Va Ttuan Ko. Rumnak Caah A Ran Bik Mi Lam Um Chun A Si

Rum Na Duh Ahcun Hlawhlang Rian Va Ttuan Ko.

Rumnak Caah A Ran Bik Mi Lam Um Chun A Si.

Chin party ah na vote i Uktu an si ahcun na si a fah lai i NLD Kawl Party na vote i Uktu an si ahcun na rum lai timi bia ka hmuh bak in ka celh lo. Ka ruh bak a ka khenh. Ka hrim ka ai colh ko.

Ngalhriam cu meithal in an kah tikah a ruh an khen lawngah beeee tiah a au ti a si. A ruh Khen lo poah ahcun nemnam a celh zong celh lo zong aa ing ziar ti a si.

Miphun pakhat a si ve mi zei ruang ah dah kan si a fah i, Aho ruang ah dah cawlcanh kho loin kan um, Aho nih dah hri in an kan ttemttom ti theih lo in a au sawhsawh mi hna minung pawl hi hla an phuah mi ah Saram fa hmanh tluk lo miphun kan si rua ti mi kha a hluan ko rua.
Kha!! Phun dang in nan ruat lai lo mu. Hlawhlang timi hi phun 4 in a um.

1.  Politics in hlawhlang

2. Zumhnak in hlawhlang.

3.  Taksa in hlawhlang

4.  Business in hlawhlang

Note: Rum na duh a si ahcun

1.   Kawl Party ah hlawhlang ko. A ruang cu Uktu an si lawng si lo, Mirum cia an tam. Miphun tthawng an si. An miphun an ttanh. An miphun caah thih an ngamh. An biak nak cash donate an tuah khawh peng. Mirang le Japhan le Europe ram zong Zei an rel hna lo.

2.  Zumhnak ah hlawhlang ko. Khuachia a Biak mi si han seh, Buddha a biak mi si hna seh, Allah a biak mi si hna seh, Hindu an si zongah na duh mi poah lei kha hlawhlang ko. Na rum bak ko lai.

3.  Taksa in hlawhlang ko. Taksa in hlawhlang zong Mirum an tam pi. Rian fawi zong a si lai dah. Nuamhnak pa 2 nakep fawn lai. Taksa he Tangka he. Rumnak nih an naih chin cang lai.

4.  Na duh mi thil phunzakip a chia ti lo a ttha ti lo, khap mi zong zuar, khap lo mi a thurhnawm mi zong zuar ko. A rauh hlan ah na rum ko lai.

🏌️Kan nih Real Chin belte cu Moses bantuk in mah miphun Sifah nak kha kan i hrawm lai. David Siangpahrang bantuk in tuu kan Khal lai. Israel miphun bantuk in rian kan ttuan lai. Kan pawngkam Zumlotu kan i bochan lai lo. Hlaw kan hmanh lai lo. Anung zungzal mi kan Pathian kan i bochan lai.

Kan miphun caah thih kan ngamh bantuk in nung zong kan ngamh dawn lai.
Miphun thiang lungpang tifim kan si caah zumhawktlak Sinak he kan ral kan doh lai.

Rum kan duh lo a si lo. Kan ram kan vawlei le Pathian pek mi fim thiam nak in rum kan I tim hna lai.

NLD ah rum nak a um lo ti kan theih.

USDP ah rumnak a um lo ti kan i fiang.

Miphun pakhat i cawm nak Ding caah Pathian nih a Za tiin ram a kan ser piak mi ah kan lung a tling ko.

Kaalawm

Salai Joel

 108 total views,  2 views today

This function has been disabled for Chin 11 News.