Richard Zatu Nih Chin miphun nih Chin Party an dirkamh a herh maw? Timi Cu Fiang Cikcek in a let cang!

2008 Phung tangin kumnga ah voikhat tuah asi mi Myanmar Ram Thimnak (GeneralElection 2020) cu November 2020 ah tuah asi lai tiin Union Election Commission nih Junethla thok ah thawng an thanh. Covid-19 zawtnak ralrin asi ko bu ah tuah a herh mi pawl cu ningcang tein tuah kho ding UEC nih aa hmaithlak mi rian pakhat tiah ruah kho asi. Myanmar ram ah ramkhel party 90 leng an um, culak ah tlangcung miphun pawl nih dirh mi party zong an tam ngai ve. Sihmanhsehlaw mipi nih Party ngan tiah hmuh mi cu an tam tuklem lo, pahnih thum li hrawng lawng a ṭhawngṭha mi party tiah hmuh asi.

Kan nih Chin ram um mipi caah rianṭuantu tha kan ngei kho lai maw? Mipi caah ralṭha in adir ngam mi palai kan ngei maw? Kan i hmuh kho lai maw? Hi thimnak in mipi nih zeidah ruahchan kho asi lai? … tbk kong he pehtlai in Pu Richard Zatu he biaruahnak kan ngei kho.Atu bantuk biaruahnak caan a kan pe khotu Pu Richard Zatu cung ah CCN team nih lunglawmhnak tampi kan ngei.

CCN Q1. Ara lai mi 2020 Myanmar Ram Thimnak hi zeitluk in dah biapi tiah na hmuh?

A1. Thimnak poh hi abiapi ko nain 2020 Thimnak hi cu 2015 Thimnak tluk cun abiapi lailo. Zeicahtiah 2015 Thimnak kha cu khatlei kamah ralkap le ralkap hlun fonhmi cozahle khatlei kamah ralkap asilomi civilian izuamnak asi. 2020 Thimnak hi cu ralkapasilomi party nih cozah ṭuan ṭhan ai zuamnak sawsawh asi. 2020 kum kan phanh tikahNLD uarnak azor. Cupinah 2015 kum ah arak um rih lomi Kawl party dang an um.Cutikah NLD ṭhawn cem dawh asi ko nain amah pakhat lawng nih cozah aser kho laimaw? party dang ai sawm ahau lai maw? ti lawng hi ruah cio asi.

CCN Q2. Kum 2015 in Kum 2020 chung teinak hmutu Party rianṭuannak kongkau he pehtlai in na hmuh ning?

A2. Kum 2015 kum tainak hmutu NLD hi san an tlai lo ngai. Chim awk atampi nain hika ahcun atlangpi lawng chim ahau. An icuh lioah thlen acu cang. Minung in zoh hlah uh party in zoh uh tiah thimfung neitu (voters) anti hna. Me peetu mizapi nih ‘elaw anti iparty zoh in NLD ah an vote vialte an bur. Cutikah santlai lo le cathiam lo tamtuk Hluttaw kuzale an chuak. Pyidaungsu Hluttaw ahhin NLD kuzale zatceu cu collegephan lomi an si ti asi.

Cun Daw Aung San Suu Kyi nih vunci peek ding minung kawl cia tein achia lo. NLD kuzale lakah miṭha an um fawn lo tikah vunci ṭuanter ding minung anei hna lo. Cutikah ralkap hna, USDP hna minister apeek hna. Tlangcungmi he irualrem nakahati i tlangcungmi rian nganpipi apeek hna. Asinain nawl nei lomi rian deuh an si. Rualremnak le remdaihnak zong achuahpi kho fawn ṭung lo.

The Rule of Law and Order timi (taya upade somoeyi) hi an aupimi ah ai tel nainanmah NLD chan ah the Rule of Law aum lo chinchin. Misual an luat lengmang.Democracy kan hmuh lai i Freedom of the Press (tadinsa luatlat khunh) aum deuh laitimi aum fawn lo. 2008 Phunghrampi remh khawh lo ding ai hngal ko mi caan tetangka dih in aremhpi hna. NLD cozah cu sipuazi an tham lo ti an tong. CMP timiChin Cable Network Channel le Pu Richard Zatu Biaruahnak ramdang kampani ca thilṭhit rian cu aṭhangcho ngai. Hihi cu Kawlmi kan nihlawhaniam caah ramdang kampani an ratmi asi. Acozah ruangah asilo.

CCN Q3. A luan cia caan vialte chung hmuhton mi zoh in atu kum 2020 thimnak ah mipi lei nih zeibantuk ṭuanvo dah an ngei tiah na hmuh?

A3. Aluan cia caan saupi chung thimnak aum lo caah mizapi nih thimfung thlaknak nawl (theright to vote) kan nei lo. Keimah ka thim uh tinak nawl zong kan nei lo. Mirangholh in chim ahcun the right to elect and be elected aum lo. Thim lomi nih an kan uk. Atucu thimnak aum cang. Mikip nih thimfung pakhatte kan neihmi hi hman hrimhrim ahau. Thimfung thlak hi kan nawlvo (right) zong asi kan tuanvo (responsibility) zong asi ti hi hngalh hrimhrim ding. Hihi kum nga danah voikhat lawng kan nei fawn.Ahodah mee (thimfung) ka peek lai tiah ruatsetmat tein peek ding. Misifaak zong mirum zong, cathiam zong cathiam lo zong itluk tein thimfung (vote) pakhat cio kan nei. Khakha na duhmi pa/nu peek ding hi kan tuanvo asi. Hngalhnak atlawm tukmi hna mihrokhrawl hna mahzawn lawng ruatmi hna cu thim lo ding asi ko.

CCN Q4. Chin ramkulh ah thimnak aa zuam ding party pa zeizat hrawng dah an si lai?

A4. Chin ramkulh ah ai zuam ding party pazeizat an um lai afiang rih lo. NLD, CNLD ,ZCD le USDP pali hi cu an icuh ko lai. Mara party asimi ENDP le Khumi party zong anmah umnak ahcun icuh dawh an si. Kawl party dang Thura Shwe Mann hruaimi UBP hna Ko Ko Gyi hruami Pyithu Party hna Chin Ramkulh ah an icuh lai le cuh lailo afiang rih lo.

CCN Q5. Aa zuam ding mi Party pawl cu zei lei ah dah an thazaang a ṭhawng i zeilei ah an thazaang a der tiah na hmuh?

A5. Ai zuam ding ti tikah Chin State chung ai zuam ding lawng ka chim lai. Chin partypathum an ifonh i CNLD (Chin National League for Democracy) an dirh tikah Chin mizapi an ilawm cio. Abikin mino an ilawm. Chin asimi nihcun Chin party cu kan dirkamh lai timi ruahnak aum. Khakha CNLD an ṭhawnnak asi. An dernak cu party chairman an ithim kho lo. Chairman rian kan ichawng lai anti. Kha nih khan milung atuai. Cun party thar asi bantukin minung (candidates) ṭha an neihmi atlawm. Tangkazong an nei lo.

NLD cu party hlun le party lianpi asi caah minung tampi an nei. NLD ticket in kai cuh ahcun ka hmuh lai timi ruahnak aum. Ramrian lei ahuam phun asi lai lo tiah kan ruahmi zong nih kai cuh ve lai anti. Baho ahcun NLD ṭhiamṭhiam nih cozah an tlaih te lai i anmah ṭanpi hi thil hman asi ko lai atimi an um. Cun cozah atlai liomi (incumbent) party an simi hi ṭhawnnak pakhat asi. Cun tangka an nei.

NLD an dernak cu cozah an tlaih chungah milung an tong lo. Thim lio biakam (campaign promises) ningin rian an ṭuan kho lo. Tlangcungmi an thin hannak cem cu NLD nih 2008 Phunghrampi Section 261 remh an duh lomi asi. Hihi cozah an tlaih hlan ah remh awk an rak timi asi. Hi pohmah remh hi federal lei kehlan ah ruahmi asi tikah NLD nih federal an duh lo tinak ah acang. Hi ruangah tlangcungmi nih NLD anduhnak azor lai.

ZCD (Zomi Congress for Democracy) hi anmah Zomi nihcun an uar bak hna. 2015 thimnak ah Chin party vialte nih ṭhutdan pakhat hmanh an hmuh lo lioah ZCD partynih Pyidaungsu Hluttaw he Pyine Hluttaw he kuzale an hmuh. NLD he zong hawikom an si.

CCN Q6. Ara lai mi 2020 thimnak he pehtlai in mipi lei teltumnak le lungfianak he pehtlai in na hmuh ning?

A6. Thimnak hi Kawlram mi nih zei ah kan rel lo. Hluttaw kuzale icuh zong kan huam lo. Aho hi kan kuzale asi ti hmanh kan hngal lo. Ramrian (politics) cu keimah he ai sainglo ti phun in kan um. Laimi lebang nihcun biaknak lawng abiapi ah kan chiah. Thih hnu vancung kainak kong theih kan duh. Nun lio vuleicung kong theih kan huam lo. Cutikah mizapi nih iteltum zong kan huam lo. Ukmi si zong hi aphung hna ah kan ruah. Laimi cu Baibal ca cawnpiaknak tampi kan hmuh. Ramrian cawnpiaknak kanhmu bal lo. Ca zong kan rel lo. Cucaah ramrian kongah kan theihhngalhnak atlawm. Phunghrampi umtuning hna kan hngal lo. Thimnak iteltum zong cu kan huam lo. Aherh ah kan ruat lo. 2020 belte ah ai ning deuh cang. Hmailei ah aṭha deuh lengmang lai.

CCN Q7. Hi 2020 thimnak chung in zeibantuk thil dah Chin mipi nih ruahchan kho asi lai?

A7. 2015 thimnak ah Vice President pakhat cu Chin miphun nih ṭuan caan asi anti caah Henry Van Thio an peek. Amah hi ralkap ṭuan balmi asi caah 2008 Phunghrampi ning in president ṭuan dingah qualified bik asi. 2020 cu VP an kan pee ti lai lo. Aṭuan cangmi Shan le Chin asilomi tlangcungmi pakhat an peek te lai. Union Minister pakhat le Deputy Union Minister pakhat hrawnghrang cu an kan peek te lai. Ambassador zong pakhat tal cu an kan peek te lai tiah ka zumh. Hi pawl hi an kan peek ve awk hrim asi. Union ah ai tel vemi kan si bantukin union level positions ah kan itel ahau. Demand tuah ding zong asi.

CCN Q8. Thimnak pawl hi 2008 Phung tang ah tuah asi rih bantuk in zeipawl dah a ṭhatnak le aṭhat lonak an si?

A8. 2008 Phunghrampi ning in thimnak tuah asi tikah aṭhatlonak cu Vice President pakhat cu ralkap asi ahau. Adang VP pakhat le President zong ral kongkau ahngalmi si ahau rih.‘Ral kongkau ahngalmi’ ti tikah ralkap aṭuan bal lomi pa/nu caah elhnialnak aum kho. Cun Pyine vunci caah Hluttaw kuzale asimi nih hmun tamtuk an ilaak tikah PyithuHluttaw le Amyotha Hluttaw icuh nak in candidates (kuzale lawng) pawl nih PyineHluttaw icuh an duh deuh. Asang deuh nakin aniam deuhmi an duh. Vunci hmuhnak an hnabei asei caah asi. Cutikah Baho aphan i bia chim kho ding kan timi pawl vialte Pyine ah cuh an itiim ti kan theih. 2008 Punghrampi aṭhatnak cu chim awk ka thei lo.

CCN Q9. Chin miphun nih Chin Party an dirkamh a herh maw? Na hmuh ning?

A9. ‘Yes’ or ‘no’ lawng bakin leh ahcun ‘yes’ ka ti. All politics is local ti asi. Ramrian cu kanmah khua, kanmah ram, kanmah miphun, kanmah holh, kanmah kanmah tinak asi. Rakhine khi kanmah kanmah atimi an si. An Hluttaw kuzale zong khi an smart (thiam) ngai. Cu tikah mi nih kan uar hna. Kan upat hna. Kawl zong nih an nehsawh ngam hna lo. An ṭih hna. An zah hna. Chin party cu Chin miphun nih kan dirkamh lo ah aho nih dah adir kamh lai?

Ṭhutdan icuh tik bel ah Chin party asi ai pat ti i miṭhalo hna, mihrokhrawl hna thim cu aṭha lai lo. Minung zoh cu ahau ve hrim. Zeicah tiah Kawl party an si zongah Laimi nihcun Laimi caah an ṭuan ve ṭhiamṭhiam lai. Laimi caah bia an chim ko lai. Kawlmi caah an chim lai lo.

CCN Q10. Minung zoh lo in Party zoh, Party zoh lo in minung zoh …tbk chim le rel aum ṭheu tawn. Hi cung ah na ruahnak le hmuh ning?

A10. Hihi ahmun le acaan nih aneih. 2015 lioah NLD nih party in zoh uh ati lio ah thil ṭha asi. Ralkap party asimi mifir party an timi USDP he lawng an icuh i tai aherh tikah party zoh an kan fialmi le party zoh in mee kan peekmi kha aṭha ko. Vuleicung thimnak tampi zongah party zoh deuh lawngte asi. Atu kan hmanmi FPTP thim ning ahcun aherh khun. Kan duhmi policy akalpitu party nih tainak hmu hna seh ti kan duh tikah party zoh aherh.

2020 ahcun USDP cu zeihmanh an si ti lai lo i NLD le CNLD chung in minung zohding asi ko. NLD zongah CNLD zongah thimfung bur ahau ti lo. President thim tikah secret ballot (mi hmuh lo mee peek) asi lai i kuzale pawl nih an duhmi poh mee peekkhawh ṭhiamṭhiam asi ko. Hluttaw ah biachimnak nawl an nei cio fawn lai. Hluttaw chung mee thlak tikah mee khat cio an nei ko lai. An idang ti lo.

CCN Q11. Atu bantuk thimnak aa zuam ding mi lak ah cheukhat cu cozah rianṭuantu hlun …tbkhna an i tel. Mah kong he pehtlai in mipi lei nih chim le rel zong aum len. Zumhnak azor chuk mi zong aum tiah theih asi. Hi kong he pehtlai in na hmuh ning?

A11. Hi kong hi Ṭhinṭhang mekazin zongah ka ṭial bal. Atulio Kawlram ahcun MP pawl hiramdang nih an uar hna bantukin uar awk kan hngal lo. Mino cathiam deuh ca ahcun MP lahkah ting 10 le MLA (Pyine Hluttaw kuzale) lahkhah ting 5 hi atlawm tuk. Mino nih an rian chuahtaak in MP icuh hna selaw an hmuh lo sual tikah an rian ṭhing ah an luut kho ti lai lo. Hmuh hmanh ah kum 5 ca lawng asi. Cucaah pensen ala cangmi zei tuah awk athei lomi ṭuan ding phun ah ruah asi. Ataktak ahcun cozah rianṭuan hlun hi an ṭha deuh. Rian an thiam. Acawngchom ding nakin athiam cia anṭha deuh. Rian poh ah experience hi abiapi tuk. Ram cheukhat ahcun Upper House(Amyotha Hluttaw) ca lebang ahcun upa mifim bak thimnak lut loin an laak hna.

CCN Q12. Ramkhel rian ah mino hmai ah fong hnga ding mi tampi kan herh hna caan asi cangmaw? Kan Chin mino lak ah tah cu bantuk hmaifong kho ding mino kan ngei khocang hna maw?

A12. Ramkhel rian na ti kei nihcun ramrian ka ti. Kum zeizat tiang dek mino na ti hna. Pyithu Hluttaw ahhin kum 25 nih icuh khawh asi. Pyine Hluttaw zongah kum 25 thiamthiam. Amyotha Hluttaw ah kum 30 tlin ahau. Cu hmanh cu an no ti lo. Zei rian hmanh aṭuan ballomi le zei experience hmanh anei lomi mino cu Hluttaw kuzale ca ahcun kan herh hna lo. Thazaang ṭan asilo cu mu. Mino cu vunci ṭhana (ministries) aphunphun ah officer si izuam ding deuh asi. Cozah zung kipah Laimi bawi kan um aherh deuh. Kawl nih kan umnak ah an hong kan ukmi hi colony ah an kan tuah asi.

Kampani le NGO aṭuanmi mino belte an iphuah ngam ahcun Hluttaw kuzale icuh hnaselaw aṭha hnga. Annih cu thim an ton lo zongah an rian ah kir ṭhan khawh asi. Coza hrian ṭuamni nih an rian iphuah riangmang i MP an icuh ahcun an hmuh lo sual ah an rian ṭhingah kir awk aṭha ti lo. Kawlram cu rian zong atam lo cu mu. Kampani le NGO aṭuanmi pawl hi Laimi nih tawk fang cu kan neih ko hna. Hi hna pawl hi coza hrian luh ding zongah an kum aluan ngawt cang lai.

👉CCNQ13. 2020 Thimnak ah teinak a hmu mi pawl nih zeidah an i hmaithlak hmasa bik a herh tiah na ruah?

👉A13. Thimnak cu mizapi ai-awhtu (representative) thim khi asi. Mizapi kan dihlak in meeting kai awk aṭhat lo tikah mizapi ai-awh in Hluttaw meeting kaitu ding thim khiasi. Upadi ser le remh le chap le hrawh hi Hluttaw rian asi i cuka biachim cu an rian asi. Cutikah chim ding kha mizapi hna, abikin mee apeetu pawl hna, an ruahnak le anduhmi le an herhmi hal ding. Cucaah MP pawl hi an me sandane (constituency) tlawn hi an rian pakhat asi ve. Cun tadinca rel peng i kan Kawlram le Lairam kong hngalh peng izuam ding. Cutikah biachim ding le biahal ding an hngalh lai. Cutikah biachim awk ahngalmi le aral athami an si aherh. Cun Hluttaw kuzale asimi nihcun Phunghrampi kong an hngalh aherh. Abik in 2008 Phunghrampi cauk ṭha tein an rel ahau. Cu lo ahcun chuahsualnak le ningzahnak an tong lai.

Hluttaw kuzale lakah mifim deuh le cathiam deuh le vanṭha deuh nih vunci rian an hmuh tikah dingte le fel tein ṭuan ding. Vunci ṭuan cu acozah chungtel an si tikah nawl an nei. Nawl neih cang cun eihmuarnak le ziknawh laaknak lam aum. Mah rumnak tuah afawite. Kha tikah dinfel le thlachiat ruah le pathian ṭih ahau.

CCN Q14. 2020 Thimnak he pehtlai in mipi sin ah chim na duh mi siaherh bia?

A14. Acung zongah ka chim cang bantukin thimnak ah thimfung thlak hi kan right (nawlvo) zong asi kan responsibility (tuanvo) zong asi. Ralkap uk chung vialte vote peeknak nawl hmanh kan rak nei lo. Hlanlio ahcun vuleicung hmanh ah minak si ruang, nu siruang, cathiamlo si ruang le misifaak si ruang hna ah mee peeknak nawl rak neih lo asi. Atu cu kan neihmi thimfungte hi ruatsetmat tein thlak ding asi. Ahodah mee ka peek lai ti hi nan hlat khawh tawk cu hlat uh. Miding, mifel, miralṭha hngalh izuam cio ulaw mee thla u.

👌👌👌Kan ilawm👌👌👌 Ref: Chin Cable Network Channel

👉👉Chin Cable Network Channel Team Le Pu Richard Zatu Biaruahnak👉👉

 179 total views,  1 views today

This function has been disabled for Chin 11 News.