Rev. Zammang Mualcin Nih Trump Le Biden Kongah Lehnak A Tuahmi Cu A Mak Lawlaw!

Nan dihlak cungah kai lawm. Huatnak pathian le Miphun thleidannak pathian a biami ka si lo. Trump nun ah Jesuh ka hmu lo, Satan tu ka hmuh. Biden nun ah Samaria Mithapa nun ka hmuh pinah Kamala Harris cu keimah bantuk tein santlailo sifak mipeem nih hrinmi fanu a si i Carson te nupa in Johnson te nupa tiang Laimi kan sinah missionaries a thlahtu

American Baptist Churches, USA(ABCUSA) ah a ngakchiat lio in nihin tiang zumtu member t’hate a si. Trump nun nih ka nun di a riamter lo, huatnak le thleidannak chuahtertu a si. Biden-Harris Administration cu Pathian nih sifak le mipeem kan caah Nu le Pa canah dirter hram ko hna seh. Ka zumhmi le ka khuaruahning hrawm ding kan sawm hna lo. Merry Christmas to you all.

Relchin Dingmi Cabia:- Zeiruang ah dah 2020 US Election ah Trump a sungh?

2020 US election cu Vawlei pumpi nih lunglut ngai in cuanh cio a si. Hakha, Thantlang, Aizawl le Lawngtlai tiang in cuanh le ceih a si. Nain, zapi nih cun Thawngzamhtu (News) pipa BBC, VOA le CNN tibantuk te hna rel/ngai loin lamkam news, Facebook le YouTube tbk. tuktak lawng kan rel ca ah atu tiang hin Trump nih a tei khawh ko rih tiah kan ruah. Asilo, Biden nih Cabinet Ministers hmanh a thim dih cang hna.

Khrihfa, zumtu tampi zong nih Trump bak a tlin nakhnga tiah thla kan cam, a tling hrimhrim lai tiah prophet biaphuan hna kan chim nain kan hal ning in a tlinlo tik ah Pathian cung tiang in kan lung aa lawm lo. A taktak ahcun, Jesuh hmanh nih, “Ka Pa nangmah duhnak bang si ko seh,” tiah a ti bantuk in kan ti khawh ve ding khi a si.

2020 US election ah Trump a tlinlonak a ruang hna cu;  #1. 2016 kum Election ah khan a rak tling sual: Businessman a si mi Trump, America Politics dawnhhlei cung ah ruahlopi in a hung kai ah khan mizapi nih President si ding ah duh/uar le duh/uarlo ding an thei lo. Nain vanthat ah a zuamcawhtu Pi Hillary Clinton kha mizapi nih an duhlo tuk ca ah Trump kha an rak vote mi a si (Keimah le Mirang Pastor ka hawile zong kan rak si). Mizapi nih duh ruang ah a rak tlin mi si loin Clinton an duhlo ruang ah a tling sual mi a si an ti.

#2. Huatu Bu an um: Trump tanhtu pawl hi Mirang lawng, Mirang kan cungnung deuh (White Supremacists) an si (Mirang dihlak in an si lem lo) ca ah cu policy duhlo lawng si loin a huat bak in a huatu an tam tuk. Cu hna cu R (Republicans) he D (Democrats) i cawh in minbunh tung loin “Trump a si lo mi, mizeipoh kan vote lai tiah a ti mi BU an si.” Party form tunglo le lenglangh tung lo in a thawng ngai mi BU ah an cang.

#3.COVID-19 Dohnak ah Policy a ngei lo: Vawlei ah a lamkip in no. 1 a si mi USA cu COVID-19 thokka in Trump a daithlan ruang le policy thathi a ngeih lo ca ah kan mual a pho cikcek. Amah zong Siibawite bia ngai loin Mask aa hruk duh lo ca ah a zaw. Tuchun (December 13) tiang a zaw mi 1,300,000 le a thi mi 265,000 kan si. Mah bu ah hin zeitindah kan doh lai ti mi policy a ngeihlo hlei ah Doctors le Scientists pawl bia a ngai duh lo. Nunnak nakin tangka biapi deuh ah a chiah tiah an ti, hihi Trump a tlaknak bik zong a si.

#4. Lihchim/Biapheh a hmang: Tuchan ahcun kanmah thawngtha chim mi hmanh Internet ah chiah a si. President chim mi chinchin cu a Ni, Caan, le hmun he record a um dih, nain a chim mi, a chimning in a tlin lo tik i bia an hal than tik ah ka chim lo tiah aa pheh peng. News cheukhat nih cun ni khat ah lih voi 50 a chim ti hna in an tial.

#5. Abortion le Same Sex thit-umnak kong ah a fale bia aa kalh: Nauhrawh kong le Nu le Nu, Pa le Pa (Ngeihkhat) thit-umnak kong ah Trump fale a si mi Ivanka Trump le Tiffaney Trump nih an pa zumhnak an chim mi aa khat lo. Pakhat nih ka pa nih a duh bak lo a ti, pakhat nih ka pa nih a ruahthiam tuk, a soisel lo tiah an ti.

#6. John McCain a soisel: 2008 ah Obama he President zong a rak i cuh i, Arizona State, R party in kum sau tuk Senator a tuan mi, R nih bochan taktak mi John McCain kha Trump nih fak tuk in a soisel i a thangchiat ca ah McCain ruakvuinak ah Trump cu an sawm lo. President hlun Obama le Bush tu an sawm hna. Arizona state hi a liamcia 20 chung cu R state ta ah ruah mi a si nain 2020 ahcun D lei ah an i mer i, D nih teinak an lak.

#7. Trump le Biden lungput le ruahnak an i thlau tuk: Campaign chung vialte Trump nih Biden hi pumpak bak in a soisel. Tahchunhnak ah, na fapa zu a ding, a hrokhrawl tbk. in a ti zungzal nain Biden nih mah hi cu chungkhar kong a si a ti ca ah, zudinnak in a thi mi Trump unaupa kong voi khat hmanh Biden nih a chim duh lo.

#8. Income Tax a pe lo: USA ahcun riantuan mi poh nih thlahlawh le chungkhar sining zoh in Ngunkhyai (Tax) pek dih a si. Zatuak in pek a si ca ah mirum nih tam deuh an pek. Mirum pakhat a si mi Trump nih kum khat i TAX a pek mi hi Laimi zapi pek mi nakin a tlawm deuh. Health Insurance kan sok tik ah TAX kan peknak le Tax return kan tuahnak an kan hal, cu lo ahcun tuah khawh a si lo ca ah Tax kan peknak kha hmuhsak khawh ding in kan i chiah zungzal. Trump nih cun ka pek ko tiah a kaa in a chim ko nain ca in hmuhsak khawk mi a ngei lo. Hi kong ah hin President in aa dinh tik ah tazacuai ding in New York state Court nih an bawh ko.

(Journalists, Columnists & amp; Commentators) By: Rev Dr. Van Thawng Lian (USA) (Hi vial hin sisehlaw a fiang ko lai dah)