Rev. Dr. Steven Hre Kio Nih Kum (50) Chung Pathian Rian A Ttuannak Ah A Hmuhtonmi Phun (10)

Chin miphun I kan pa Rev. Dr. Hre Kio nih Pathian rian a tuannak kum (50) chung ah khrihfabu chung ah thil a hmuh tonmi phun (10) a chim. Cu a chim mi Thil phun (10) cu zeidah an si? a tanglei ah hin van rel hmanh.

Pakhatnak ah Khrihfa Bu chung ah hin a holh kho bik mi hi a mah zumtu bik, a piangthar khunbik an si lem loh. An holh kho taktak hna.

Pahnihnak ah Khrihfabu chung ah a langsar bik khi riantuan hlei an si loh.

Pathumnak ah Khrihfabu chung I mirum pawl nih hin cheuhra cheukhat hi dik hlei in an pe loh.

Palinak ah Khrihfabu chung ah dai tein a um mi, a lang lem lo mi le bochantlak kan ti lem lo mi pawl an zumhnak tluk le an zumhnak a fek kan hmuh tik ah kan lau, ka khuaruah a har.

Panganak ah Khrihfabu chung ah mino pawl hi zumtu nih tuah lo ding ti mi an tuah tik ah hnua ah chia hna hlah uh, hnong hna hlah uh. Pathian nih an nunnak a thlen hna tik ah cun fak tak in Pathian nih a hman khawh hna.

Paruknak ah Khrifabu chung ah kan bochan bik mi hna cu, nu-hmei pawl an si tawn. Cat lo in thla a kan cam piak ka hmuh tik ah kaa lawm tuk.

Pasarihnak ah Khrihfa rian a tuan mi pawl hi kan nunnak ah Thlarau thazang um hlah sehlaw kan rocar lai I kan tuan kho lai loh.

Pariatnak ah Pathian nih Pa pawl a hman hna bang in nu pawl zong a hman khawh ve hna ti mi hi theih in nu pawl hi nehsawh ding men an si loh. Pathian nih a hman ah cun minung nih zei rel lo in um hlah uh.

Pakuanak ah ‘LAI’ mi cu one million hmanh a tling lo mi kan si. Kan I komh, kan I bawmh, kan I zangfah hna lo a si ah cun kan nun a sau lai loh. Chin ti mi a dirtertu cu Lairam I minung pawl an si. I komh lengmang ah a tha.

Pahranak ah kan I komh khawh nak le kan I dawt khawh nak cu kan nunnak (oxygen) a si. Cuti a si lo ah cun mi nih an kan dolh dih lai.

Cred: Chin TV International.

 391 total views,  1 views today

This function has been disabled for Chin 11 News.