Dam 18 Ah Ti A Tam Caah Ralrin Dingin An Thanh Kawlram chung Dam 18 ah khiahmi lengin ti a tam caah a hniamnak lei a ummi khua hna cu ralrin dingin Agriculture and Irrigation vuanci zung nih ralrinnak ca a chuah.
Ramchung ah atu hrawng ruahpi a tam ruangah Karen, Rakhine ramkulh le Erawady ramthen chung hmun tampi ah ti lian nih khua le lam tampi a phum pin ah Dam 18 cu ti rikhiah mi a lonh cang tiah theih a si.
August 6 ni record ningah ramchung hmun dangdang ah a ummi Dam 200 leng chungin Karen, Chin, Mon, Rakhine ramkulh le Sagaing, Pago, Erawady, Magwe ramthen chungah a ummi Dam 18 ah ti a liam cang tiah Irrigation le ti lei riantuannak department nih an thanh.
August thla zarhkhatnak thawkin ruah tampi a sur ruangah Karen ramkulh Myawady, Kyarinnseikkyi, Ayeyarwaddy – Ngayokkong peng le Rakine ramkulh Tongkok le a hniamnak hmun lei cu ti nih a phum caah mipi tampi harsatnak an tong.
Kawlram chaklei le a laifang ah hlannak in ruahti a tam caah Dam chung ti a lut mi a tam ngai tiah riantuantu hna sin in theih a si.
Dam tam deuh ahcun rikhiah mi in pe 1 hrawng lawng a lonh nain Karen ramkulh Hlaibwe pengah a um mi Yebok Dam cu pe 3 in a lonh cang tiah thanh a si.
Atu ah Mandalay, Magwe, Naypyitaw, Ayeyerwaddy ramthen, Chin, Rakhine, Karen le Mon ramkulh hna ah ruah a tam lai tiah state meteorology le hydrologies hna nih an thanh tiah Mizzima news nih a tial.TCP
Leave a Reply