Rawl Ttiltlawt

Rawl Ttiltlawt Mtt. 15:21 – 28

====================

A fanu damlo ruangah a lung a dongtuk cangmi Foinisia minu le Bawi Jesuh an itonnak hi Biakam Thar chung ah milung a khoih bikmi tuanbia pakhat a si. Jesuh cu a zultu hna he inn i kharkanh in an i din. Minu nih a kawl peng hna caah an umnak a hngalh. Tih le ningzah kaltak in innka a va namphut i Jesuh cu bawmh a hal. Zeitluk in dah a tuarfah ti a fiang. Bawi Jesuh nih a rak zohlo, a chawnlo. A zultu nih thawl, hna a kan hnawh an ti chap. Jesuh zongnih miphun dang caah ka ra lo a ti. Minu nih lungdong lo in a naih chih, a khuk aa bil i ka bawmko tiah a hnek. Jesuh nih fale rawl cu uico pek phung a silo a ti than. A bia a faktuk. Nain minu a nuarlo, a lung a dong thiamlo. Cabuai in a tlami rawl ttiltlawt cu uico nih an ei tawn veko pei tiah a leh. Minu bia nih Bawi Jesuh lung a tongh. Na duhmi kan tuah piak lai a ti. Cu can theng ah a fanu a rak dam. Minu hi lungfah pi awk a si nain dawhtuk in tuanbia a dong. Rawl ttiltlawt a hal ko nain Bawi Jesuh nih cabuai cung rawl, damnak a pek.

Bawi Jesuh hmai kun le uktu hmai kun aa dang. Jesuh pekmi rawl ttiltlawt le uktu pekmi rawl ttiltlawt zong an i dang. Cucu thleidan a herh. Cawhlo ding a si. Moses nih Faro a halmi hi rawl ttiltlawt lawng sisehlaw Faro a mirh ko lai. A lu a suk piak lai, minthatnak laksawnhg hmanh a pek lai. Cabuai cung rawl a hal caah Faro a thin hung. Israelmi hi anmah tuahsernak nih Izip sal a canter mi hna a si ko. Nain zungzal sal siding hi Pathian nih a duhmi hna a silo. Miphundang rawl ttiltlawt orh peng ding a siang hnalo. Cabuai cung rawl pek a duh hna. Cucu CNF nih an i hmaithlak ve. Dirkamh an phu. Chinmi hi Kawlmi rawl ttiltlawt a to ding kan silo. Cabuai cung ah rawl a ei tti ding tu kan si.

Paul nih minung ca Pathian tinhpiakmi kong hitin a chim: tlik aa zuammi hna nih a uai khomi pangpar lukhimh (laksawng) hmuhnak ding ah fakpi in an pum an hrem i an i zuam. Sihmanhsehlaw kan nih zuammi cu zeitikhmanh ah a uai kholo mi pangpar lukhimh caah a si a ti (1Kor.9:25). Minung pekmi cu an uai than kolai. A uai than dingmi pangpar lukhimh ah kan di a riamh ahcun Pathian nih co ter a kan duhmi, a hmunmi pangpar lukhimh kan sung lai. Rawt ttiltlawt i kan hna a ngam ahcun cabuai cung rawl kan sung lan lai tinak a si.

Bible chung thlarau bia hna hi kan nunchung kan miphun ca ah an biapi tuk ve. Laksawng hi a sunglawi, mikip co khawhmi a silo caah. Sihmanhsehlaw Pathian nih Bawi Jesuh in, kan i tlaklo nain a kan pekmi veel, khamhnak dah tilo, i tlaklo bu pekmi vawlei laksawng hna cu tihnung an si tawn. Fel ruang, thiam ruang ah hmuhmi rank (reng) kai cu a sunglawi tuk nain zakzehnak pekmi rank cu tihnung a si. A mah ta a silo, a petu ta a si. I tlak bute i hmuhmi laksawng (minthatnak) cu a sunglawi tuk. Tlaklo bu pekmi a si sual ahcun, pekmi nih petu hmai ah kun zungzal a hau tawn. Thildik chuak kholo in laksawng nih a phenh dih. Chinmi nih cu chung i kan luan velo a herh.

Chan le can, ram sining aa thleng cuahmah mi sin in kan hmuh kan co khawh ballo mi thanchonak he aa pehtlaimi kan van tingco ve hna. Lunglawm a si ko. Nain thleidan thiam a herh. Thanchonak hi cozah le uktu nih an tuah hrimhrim dingmi a si. Laksawng an si lo. Rawl ttiltlawt men a si awk a silo. Petu lei kap cun pek kan siko. Kanmah nih teh zeitindah kan cohlan? Phutlo mipi laksawng, zakzehnak i pekmi ah kan i ruah ahcun petu lungtlinh zuam peng a hau lai. An rawl ttiltlawt lawng a si ahcun an cabuai tang i bawh peng a hau lai. Rawl ttiltlawt cu fah tik lawng ah cuk ding a um, fahlo tik ahcun a dihko. Rawl ttiltlawt cu khimnak a tlak bal fawnlo. Cite liah khawhmi sia cu khoika paoh ah hruai khawh a si. Cite le rawl thleidan a hau. Rawl ttiltlawt le cabuai cung rawl theidan a hau.

Pu H. Van Thio vice president a simi hi ASSK laksawng, NLD laksawng phun in a chimmi an um lengmang. Hihi ka lung a fak. Hnemhnak laksawng a silo. Aa tlak hrimhrim ruang ah a hmuhmi a si. Kawlram chung MP hna lak ah vice president tuan ding in aa tlak bikmi a si caah a co mi a si. Hitluk a biapi mi dirhmun hi laksawng phun men in pek khawhmi a silo. Zaangfah ruang pekmi le rawl ttiltlawt bantuk ah kanmah nih kan i ruah ahcun ASSK le NLD tluanh peng pei a hauh lai cu! Aa tlak ruang ah pek a si. A tuan i thatuk in a tuan khawh fawn. Chinmi kan hmai a hngal. Miphun fehnak ah hmanding mi a si. Kawl hnuzulh nak caah si hram hlah seh.

CNF tleh in NCA minthu hriamtlai phu pawl ASSK nih Peace Making Prize minthatnak a pek hna. Ka khuaruah a har! Zeitindah a mah he cabuai cung ah aa do cuahmah ko mi kha hi laksawng a pek khawh hna zia a si? Upatnak maw a si leemnak dah??? NCA hnatlaknak aa lim dihhnu pekmi sisehlaw lung a hmui tuk hnga. NCA lam thluan nih le a bingbo tuk rih tung. Sio rawl tarh hna a si sual hnga maw? Cite hna a si sual hnga maw? Rawl ttiltlawt a si sual hnga maw? CNF nih a thleidan ko lai.

ASSK cu uknak thlen aa zuamnak vawleipi nih an hmuh tik ah an upat. Cu caah minthatnak a phunphun an pek, an vorh hnawh. Ram hruaitu a si than tik ah laksawng tampi an chuh than. Ka uar khunnak cu laksawng an chuhmi nih a tuahding aa donh terlo. A laksawng a hmunhnak ding ah a dirhmun a thlenglo. A petu nih an rak pekko, an duhning a silo tik ah an chuh thanmi cu anmah tuahmi a si ko. Laksawng a rak petu hna nihkhan ASSK dirhmun an hmuh piak thiam tilo. Anmah duhnak tuahter lawng an duh. Cu caah kha an laksawng kha laksawng taktak a rak silo. Siter an duhmi lam cung hruainak cite bantuk a rak si.

Tulio ah kan zohthlami Dr Sa Sa. A thil tuahmi hna khi cozah bawmhnak in aa thokmi an silo. Pathian nih a hman. A thil tikhawhnak a langh tikah cozah nih lam an onhmi a si. Nain onh chommi ah amah nih aa ruah ahcun an onh than rihnak ding caah an lungton aa zuam lai. Cucu rawl ttiltlawt cu a si. An onh ruang ah an chung pil a herh lemlo. Aa ong cangmi innka hi kau chinchin aa onnak ding ah zuam chintu a hau. Cucu i dirkamh le i bawmh a haumi cu a si. Cucu cabuai cung rawl a si. Fah chommi rawl cu rinh a tlak ballo.

Kan miphun ca ramkhel rian hi cabuai cung rawl le a hmunmi pangpar lukhimh hmuhnak ca si hram koseh.