Rampi Hruainak Ah Tihnung Bik Mi Ei-Hmuar Nak Le NLD Konglam A Si

By Jacod R. Thang

NLD Nih Eihmuar (Corruption) Doh An Tim Tilo Caah Eihmuar-nak Dotu Ding CNLD Vote Hna Usih (Part #1)

==========================

Ram a hrawhtu le sifahnak a hrampi taktak tazakhan cu Eihmuarnak asi. Democracy le Federal ram si zongah eihmuarnak aum ahcun ram a țhangcho kholo bantukin Democracy ram silo zongah eihnuarnak umlomi ram cu an țhangcho ko. Ram thilchuak a rummi (natural resources) zong eihmuarnak aum ahcun an sifak peng ko lai. Tahchunhnak ah Indonesia ram khi Kawlram nakin alet in Natural Resources a tam deuh nain eihmuarnak nih a sifahter ve hna. Natural Resources aum bak lo nain Singapore khi Eihmuarnak aumlo caah ram țhangcho ah an chuak kho.

Kawlram kan sifahnak a hrampi taktak cu Eihmuarnak ruangah asi ko. Uknak tha lo, ralkap uk ruangah kan sifak mi siloin Eiihnuarnak a tam ruangah kan sifah i kan țhangcho khawh lonak asi cem.

2015 NLD nih Party teinak caah an rak au-thawng cu Eihmuarnak kan doh lai i a thiangmi Cozah (Good Governace) kan ser lai ti a rak si. Mipi nih kan rak uar tuk hringhren. Asinain Cozah kum 5 an tuan Chung ah Eihmuarnak cu an do kholo. Cu hlan Cozah he an i dannak zeihmanh aum hlei lo. 2020 Election caahcun NLD nih Eihmuarnak dohnak ding kong an chim ngam ti rua lo, an daidep cang ko. Kan i chuah sual lai ti an phan ca zongah asi men lai dah.

Chinram Cozah cu Kawlram ramkulh le ramțhen 14 chungah Eihmuarnak ah pahnihnak asi tiah Asia Foundation nih a langhter. Cun 2020 Election ah MP/MLA cuh aa timmi NLD Candidate ahohmanh nih Eihmuarnak hi kan doh lai tiah aa hmaithlak mi an um bak lo. Cu chinchap ah Eihmuar ruang i Vuanci (Minister) in phuah mi Isac Khin hna Chinram NLD teinak caah Campaigner bak ah rian an van pek hoi hi cu țihnung lei asi cang. NLD nih hin Eihmuarnak hi doh loin tha dara a pek deuh ti awk in ruah khawh asi.

Chinram nih Phunghram thlen khawh hlan le Federal Democracy kan hmuh khawh rih lo zongah Eihmuarnak kan doh khawh ahcun kan ram cu mithmuh in a țhangcho hrimhrim ko lai. A nuam deuh hrimhrim lai. CNLD nih biatak in aa hmaithlak mi pakhat cu Eihmuarnak doh le hloh hi asi. Cucaahcun Eihmuarnak doh a tim tilomi NLD cu vote ding asi ti lo. Kan ram țhanchonak caah Eihmuarnak doh le hloh aa hmaithlak tu kan Miphun Party CNLD hi dirpi in Vote viar hna usih. Ram nuam ser kan duh ahcun CNLD vote pek ding in kan sawn hna.

#Note..Eihmuarnak sullam le țih anun zia Part 2 ah ka peh țhan te lai.

 116 total views,  1 views today

This function has been disabled for Chin 11 News.