Ramkhel Cuanhning……HEI SIKHO SELAW !

(Ramkhel cuanhning…….)

HEI SIKHO SELAW !

==============

By Siang Kung Tz.

Myanmar ram i 2020 General Election anai cang. Mipi nih ramkhel lei kongah kan hna kan chit liote asi kan tiko lai cu! Politics kong chim le ṭial caan zong asi kan tikhawh. Achambau rihmi democracy hman buin general election voithum kan hmannak a sicang lai i, i thimnak ngeih lioah umtuning / ṭhutdir ning kan thiam ngai cang lai. Ava le inn ah cawlcangh sual aphaang i, acawngormi, nupi thar btk. cu kan si lailo ti ka zumh. Cupinah, kil tampiin politics cuanhning zong kan thiam ngai² cang tihi social media in kan hmuh khawh. Thanuam ngai asi. Kan umnak ram i uknak kongah lungthawh nak tampi kan ngei ti alang. Hihi ahote ca hmanh siloin, kan mah ca bak asiko. Amah belte, hihi a kan hruaitu hna kan tahnak sikho selaw ti ka duh. Mipi le ram kha apakhatnak ah achia hmasa i, zeidang vialte a pahnihnakah achia khotu theihhngalh khawh hi sihram seh tihi asi.

Tutan Kawlram pumpi thimnakah, party pawl an ṭhawn ning le cozah an serning tihin sikho/kalkho seh tiin duhning saduhthah nan ngeicio lai. Cucu, keizong ka ngeive. Cupinah, atak² in acangkho dingmi hmuhning zong ka ngei rih. Cu ka hmuhning cu pahnihin kalpi khawh asi. Ram pumpi (National) ca le State ca tiin kan ṭhen lai i, atawinak in a tangleiah ka ṭial lai.

National (Union) leiah kan luut hmasa lai. Nihin ah Myanmar Election Commission (MEC) nih apom (registered) cangmi party dihlak 50 hrawng ansi i, culak ah cun 20 tlinglo hi Union party ah ruah ansi. Adang 30 renglo hi tlangmi hna nih dirhmi Regional (State) party an sive. (A figure ai dangpah lengmang caah “a hrawng” tiin ka chimnak asi.) Vanchiat kan tilai maw, vanṭhat kan tilai dah, Union ah cozah a serkhoding party cu atu ahcun NLD party lawngbak asi. (2010 thimnak kha cu special case ah ruahding asi, chimding tampi aumko lai) NLD party pakhat lawng nih vanchiat biaah, simple majority hmanh va tlinglo sual selaw, amah NLD party nih a hruaimi coalition cozah a dirhkhawh ṭhiam² ko lai ti ka zumh. Cucu, thla 5/6 hnuah kan hmuh colhko lai.

Atu Myanmar ram zoh tikah, politics ah kan kum a no rih. Cupinah, ai thlengkho tilomi le thlen a duhlomi tampi an um rih. Chim duhmi cu, kan dirhmun hi ṭihnung pah asi rih. Cucaahcun, afekmi le atlamtlingmi democracy uknak a hmangmi ram i akan luhpi khotu party cu NLD party lawng² ansi kan tiko lai cu! (Adang party ngandeuh pawl hi an hram zoh tikah zumh an har ngai) Union level ahcun NLD party cu kan duhbik ding asi pinah, kan tlinterding zong asibak tiah ka ruah. Na ruah veko lai ti ka zumh. Cuti asiah zeitindah kan tuah kun lai? Zeitin dah vote (mee) kan ṭhen lai i, kan MP pawl kan phawt hna lai? tihi tuaktaan rih hna usih.

State pasarih hna nih anmah State cozah chungah aṭuanding MP an ngeih btk.in, Union (Amyotha le Pyithu) caah MP zeimawzat ngeihcio asi rih. National party nih State ahcun cozah serloin, anmah local asilo ah, regional party nih cozah an tlaih zongah aṭhatlonak zeipipa chimding aum lem lailo tiah ka ruah. State i ahmailei kong tuak lebang ahcun, regional party nih cozah aser kha State chung minung hna nih kan duhdeuh awk hmanhah ka ruah. Zeiruangah ti ahcun, National party nakin Regional party nih anmah State caah aherhmi (hmuh khawhmi le hmuh khawhlomi) thil a phun² kha fiang deuhin ahngalh khawh lai caah asi. Mahle innchungkhar herhbau cu midang nakin kan mah nih kan hngalhdeuh i, akawl hawl zong kan thiamdeuh ko lai. Cucaahcun, State party nih dingteo tein angeihmi MP hna nih Central (Union) party aiawh in State chung i thimmi MP nakcun kan herhbau tete zong kaudeuhin an luhhnawh khawh lai i, an ṭuan ngamdeuh ko lai tizong ka zumh. State cozah kha anta asi i, anmah cozah asikhun. Union (National) party nih State pakhat khatah cozah aser ahcun, state cozah cu anmah duhningin an cawlcang ngam lailo. Zeiruangah tiahcun, anmah nakin nawlngei deuhmi pi le pu an cungah an um i, an nih pawl kha cu an pi le an pu aiawh / central aiawh deuh i ṭhut termi an si caah asi. Afawinak bik tahchunhnakah, nan khua uktu khuabawi dingah khual maw nan duhdeuh, laihlum khuami dah? tiphun he ailo ko hnga. (National party cu state caah khual party tikhawh ansi.)

State ca leiah kal rih hna usih. Acung i ka chimcang btk.in, State 7 hna chungin dirhmi State (or) Regional party hi 30 renglo ansi i, kum 2010 le 2015 thimnak ah State zeimawzat ah teinak an co. Khabantuk khan, teinak a cotu State cu Union party nih a ukmi State nakcun political mit in azohtu hna caah cun an hmuh ning aidang ngai lai i, mark an hmuhmi zong ai thlau ngai lai ti ka zumh. Mitampi nih Union ah cozah aser dingmi National party kan thimlo ahcun, State ṭhancho nak leiah parathlei in ankan thlei lai i, kan rocar tuksual lai ti an phang. Hihi i ṭhihphaihnak sawh² asi ti cu kum 10 kan hman cang mi hmuhtonnak nih tehte ah akan dirpi cang. Abiapibikmi cu, Union Guide Line ningin State nih programme le project suai thiam kha ṭhanchonak lam a sideuh.

Ram pumpi politics kan zoh tikah, state hna nih ramkhel leiah kan hoining le saduhthah kan thlenpah lengmang ahau cang tiah ka ruah. Cucu, kan ai-awh dingah kan thimmi MP hna in kan langter awk asi. Bianaah, Chin State nih MP kan ngeihmi dihlak hi 45 ansi i, 24 kha State MP le adang 21 kha Union (Amyotha le Pyithu) MP ding an sive. State MP 24 chungah 18 hi elected MP ansi i, 6 hi military appointee (thimlomi) ansi hoi. Chim duhmi cu, Chin State nih thim dingmi MP 18 chungah atamdeuh hi State (Regional) party chung minung sikho hna selaw tihi asi. Cuti asikhawhah cun, State cozah nih Union cozah sinah a aukhuannak (voice) kha ṭihzah buin a ngaihpiak deuhko lai ti ka zumh fawn. National party nih State ah cozah an ser ahcun, Union cozah nih kan mah minung an sicang tiin hnangam phun in an i laak i, State Affairs ruahpiak huamlonak achuak lengmang ṭheo. Kan innthlang ram in tahchunhnak ka laak lai. Cental ah Congress cozah atlaih lioah Mizoram State ah Congress nih cozah atlaih ve. Mizoram ṭhanchonak kongah MNF nih cozah atlaih lio le Congress nih cozah atlaih lio ai dannak hmuh ding aum lemlo. Azeimaw caan lebang ahcun, central Congress cozah nih anmah minung State Congress cozah nak hmanh in opposition MNF bia le hla hi an ngaihpiak deuh hlah maw ti-awk khin aum tawn. Central Congress cozah cu State Congress cozah cungah kan mah minung ansi cang tiin hnangam phunin ai la kan tiko lai cu!

Chin State nih Union (Amyotha le Pyithu) MP kan ngeihmi 21 hi zeibantuk hmun ahdah ṭhu-dir hna seh ti kan duh timi kong ka ruahning tlawmpalin ka van peh rih lai. Abiapi veko nain, State MP tluk khan cun buaipi tuk dingah ka chia lemlo. Chim duhmi cu, Union party in thimmi MP ansiah siseh, Regional (State) party in thimmi MP ansiah siseh, aṭha veveko tiah ka ruah. Atu Myanmar ram dirhmun zoh tikah, federal kong le democracy kong he pehtlaiin, zumh bikmi le bochanbikmi National party cu NLD pakhat lawng asi rih. Union Member of Parliament (MP) caah Chin State nih a ngeihmi 21 hna hi Regional party aiawh in zeimawzat an tlin ahcun kan saduhthah atling kan tiko lai. Union party NLD aiawh in an tlin zongah aṭha ṭhiam² ko. NLD party atha dengteo tein kan ṭhawnter tinak asiko. Aṭhatnak cu, federal le adikmi democracy kan ngeih khawhnak dingah asikhawh chungin aizuam i, lam akawltu asi pinah, 2008 ralkap phunghrampi thlen/remh ai timlaam pengmi kan ngeihchun Union (National) party asi caah asi.

 

 228 total views,  1 views today

This function has been disabled for Chin 11 News.