Kawlram Nichuah-Thlanglei Ah Ralzaam Sing 1.7 Leng An Um Kawlram kong he pehtlaih in United Nations Office for the Coordination of Humanitarian Affiars (UNOCHA) nih a thanhnak ah ralhrangbu cawlcanghnak ruangah Kawlram nichuah-thlanglei (south eastern) ah ralzaam 170,200 an um rih tiah a ti.
Mah ahhin May 21 hnu kahdohnak a chuah pah lengmangnak Kareni le Shan ramkulh thlanglei ah a um mi mipi 121,400 an i tel ve tiah UNOCHA cathanh nih a langhter.
UNOCHA nih Chin ramkulh, Mindat peng le a pawngkam ah mipi ralkap le ralhrangbu kar kahdohnak ruangah Chin ramkulh, Magwe ramthen le Sagaing ramthen chung ralzaam chikhat i dornak hmun ah 100 lengah a um lio mi ralzaam 18,100 an um lio a si tiah a ti.
2021 kum hramthawk in Shan ram thlanglei le chaklei ah ralzaam 22,000 an um i, ralzaam chikhat i dornak hmun 33 ah a dor lio mi 7000 hrawng an um. Rakhine ramkulh peng tampi ah ruahpi sur le ti lianh ruangah a thi mi hna an um bantukin hmunhimnak ah a zaam lio mi a thong in an um tiah UNOCHA nih a langhter.
UNOCHA nih 2021 hnu bawmhnak rianrangin a herh lio mi 2 million bawmhnak caah US $109 million kan ngah khawhnak dingah timhtuahnak kan ngeih lio a si.
Harsatnak a tong lio mi Kawlram bawmhnak caah (HRP) sin ah US $ 276.5 million kan hal mi chungin July 29 tiangah 42% cu kan ngah cang nain a tang rih mi 50% caah bawmhnak fakpi in kan herh rih ko tiah UNOCHA report nih a langhter.Ref; Myanmar Humanitarian update No. 9/30 July 2021
Leave a Reply