𝗥𝗮𝗹 𝘁𝗲𝗶 𝗱𝘂𝗵 𝗮𝗵𝗰𝘂𝗻 [𝗔𝗺𝗯𝗶𝘁𝗶𝗼𝗻] 𝗻𝗲𝗶𝗵 𝗵𝗲𝗿𝗵.
Chinmi dohthlennak hi a hlawhtling lai lo, ti ka chim tawn caah mi cheukhat nih ka cung i “respect” an neih tilo kong an chim pah. Mi dang asiloah ka ram/miphun caah zei upattlak sinak hmanh ka tuahmi um lo kai theih le a poi ah ka chia lem lo, miluat pakhat ka si. Sihmanhsehlaw, ka miphun a luat lomi an tam tuk rih ti ka theih caah zapi hi ai pehtlaimi kong ah kai ceih, kai thlaak asiloah sawiselnak (critics) ka tuah tawn men khi a si.
[Ambition] ti hi Lai in cun “cungkai duhnak” ti lawng in a leh, nain mirang in ai fiangmi caah si lo in “si duhnak, cu si khawh nakding ah dawnkhantu i neih lo,” tilei khi a sawh duhmi a si. Mi tang toidor nih a dawn lo, lihchim a herh cun a chim a si nain a hmuitinh a thlau lo, mi thah a herh cun a that, mi sinum ttuan chung a herh cun a ttuan ko. Zei thil a tuahmi paoh ah hmuitinh a thlau lo i cu a hmuitinh caah cu a tuahmi thil vialte cu “timhlamhnak” a si ding biapi a si.
Raithawi siloah nun i (thaap) pekchanh (sacrifice) loin raltei khawh si lo, an ti nain [Ambition] ngei loin nunthaap le raithawi a har, a si hmanh ah pumpak maw caan khat caah a si. – A sau sual la, cu kong cu hi vial!
Taliban nih uknak an lak khawh ning van ttial, a ka timi nan um pah le cu he pehtlai in bia i ruah bantuk in kakip benh in ka van ttial la. An i thawk ning ka ttial cang caah Taliban nih uknak an tlaih khawh tthannak a ruangbik ah ka ruahmi tu ka van ttial la le cu hna cu; pakhatnak ah an hmuitinh a fiang (Afghanistan ah daihnak um tthan ding le a thianghlimbikmi Islam ram si ding.), pahnihnak ah cu hmuitinh a siter khotu le hruaitu si duhnak [Ambition] an nei, Pathumnak ah zeitik hmanh ah an hmuitinh an thlau lo bantuk in khawika hmun le zei caan paoh ah an herhmi thazaang (hriamnam/hawikom/fimnak) pakhatnak an chiah. Palinak ah an sinak asiloah kan si tiin (doh a thlengmi/ hriamtlai an simi/ uknak duhmi) an langhter peng. Panganak, zuu an ding lo [Muslim hi zu ding an tlawm taktak.]. 1996 in 2000 kum tiang an rak tlaihmi uknak lak tthannak ding ah kum 20 lawng an rau. USA Nevy training pekmi, American hriamnam tamtuk ai neih i ralkap sing li hrawng neimi Afghanistan cozah cu ral i tuk hau lo in an tei.
Taliban le Chin dohthlennak hi tahchunh ding cu a si lo. Annih cu ram pakhat miphun pakhat an si, cun biaknak pakhat an si. Chinmi cu ramkomhbu chungtel kan si, kan biaknak ai dang, miphun ai dang i khuaram zong ai dangmi sin doh a thlengmi kan si. Asinain a caan si caah tlawmpal in an sin i cawn asiloah zohchun awk hna um maw ti hei ruah bia a si.
Chinmi kan dohthlennak “mahte khuakhan lairelnak” timi hi [Ambitious] Chinram le Chinmi zalenmi/luatmi si duhnak a ngeimi bia a si lo tiah ka ruah. Macau, HongKong, Catalonia (Spain) tibantuk tampi um rih, khuakhan lairelnak nawl an nei hna nain a buai lengmang, annih hna cu holh khat, biaknak/khuati/tuanbia khuaram umning ai naih/khatmi an si hna. Chinmi nih Kawl lakah mahte khuakhan lairelnak nawl hal, Pyitaungsuh pay bar, hrawng hi cu hmuihtinh fiang a si lo caah Ambition zong um lo.
Hmuitinh fian lo i Ambition a um lo ahcun phaisa maw, rank maw, asiloah harsatnak le chungkhat sahlawh khuasaktintuk nih chumbang kan dohthlennak hi a tlau kho. Mahte khuakhan lairelnak duh ahcun, ramri neih a herh, i a vengtu ralkap le hriamnam a herh. Kahdaihnak tuah i hotel ah ih le cabuai i bia i ruah paoh ah hmuitinh a phakter khomi rak thlau/derter. Cucu Taliban an si lo, Trump nih 2018 ah remdaihnak ser u a ti le cabuai ah bia an i ruah pah in Taliban nih heh bomb an puah, hriamnam an i zalh, i an hmuitinh lei an panh tthiam. Chinmi cu cabuai cung pin kan pet kho lo.
Hlen cuahmah, lem lengmang khawh, a donghnak ah uknak an kan chuh hnu hmanh ah a za cang, ramkomh bu in kan chuak lai, ti zong ai tlirkhawng lomi dohthlenak cu Taliban he tahchun ding a si lo ka timi cu a si. Mipi nih online luklak i van mawhchiat men ah mah miphun tu a tlirhkhonhmi dohthlennak, zeidah i phuhrun ding kan ngeih ti hi dakaw biahalnak a ra tawn cu. Taliban kong i palinak ka chimmi khi a si, Kawl officer/cozah ti ngam hleng lo i Laimi le Laimi bomh in i tlerh hei ti hrawng, dalaan a domi bang,.. Kawl nunnak 10 le Lai 1 hmanh a phu lo.
A donghnak ah Zuu a ding i a rimi miphun dohthlennak cu cabuai pin a peh khawh ding cu a har bak. Ambition a neimi nih zuu din in caan a dihter lai lo dah. [biatlang ah Ral ka timi khi, Dohthlennak ti zong si ko]..
Atu zong CDF/PDF in SAC doh cuahmah a si tikah Chinmi nih Siasal a biami miphun sinah i fonh ding in thisen le nunnak pek kan i timhmi nih “Afghanistan ralkap hmanh nih an tuk ngam lomi ral cu American ralkap nih an tuk hau ti lo.” timi bia hi ruahter. Politik ahhin a sangbik independence in i celh lo in 1947 i kan rak si cangmi ramkomh bu chungtel kha kan sok peng rih. SAC cu rampum ral nih a thlaak te (men) lai, nain Chinmi zalennak ral cu a dong la lo, a ruang cu mi dum, lo, inn ah i benh i bawktom dohthlennak a si caah si.
hi vial hin rinni hmang nuam hna u.Source : Si Bawi Lian Mang
Leave a Reply