Ralkap uknak tang ah rian kan tuan duh lo i CDM tuah asi. Ralkap uknak kan doh ah hin uknak tha lo lawng si loin uknak tha lo chung in a hung luang mi thiltha an tuah mi zong doh chih asi. Tutan ah pengkip ah ralkap nih COVID khamnak si a bawm hna i mi tampi nih an cohlan.
Ralkap nih tuanvo latu ah mipi nih ser mi, mipi bawmhchanhnak in dirh mi covid 19 khamnak lei tuanvo latu hna sin ah sii ai he tuanvo an pek hna. Ralkap pek mi sii le tuanvo cu te lak awk asi maw? Tihi hal lo awk tha lo.
Ralkap pek mi sii lak le tuanvo lak cu ralkap he riantuan ti asi ve ne lo maw? Hi zawn ah hin ralkap nih mark tamtuk a hmuh nak lai ka phang ngai. Ralkap uknak kan hrawh khawh i federal kan hmuh khawh ahcun Chin miphun hi Credit pek tlak kan si lai ka zumh.
NUG nih ralkap uknak hrawh in federal sernak ding ah Chin Miphun chung in kan pa Dr. Lian Hmung Sakhong an thim tik ah NUG hi an thiam tuk tiah ka ruat tawn. Tu lio cu cozah tling kan ngei lo sikaw President, State counsellor an si ah Prime Minister an si ah riantuan ding taktak an ngei deuh rih lo.
Tutiang Vuanci lak vialte ah Dr. Lian Hmung Sakhong hruaimi Federal Department ah hin rian vialte aa khong dih, atambik, ahar bik zong asi. NUG zong federal uknak ca asi, 2021 dothlennak revolution pi zong federal ca thiamthiam asi i federal department hruaitu Dr. lianHmung Sakhong cung ah thil lian ngan taktak a um tihi hngalh aherh.
Adang Pyodawngsu Vuanci hna le president hna cu zei rian ngaingai tuan awk um lem lo, asinain Federal department pi ca cu riantuan ding atam tuk. Cucaah NUG nih a hlawh tlin ahcun Federal department tlaitu kan pa Dr. Lian Hmung Sakhong thawng in Chin Miphun hi kan hmai ahngal taktak lai ka zumh.
Cucaah Chin Miphun hna, kan pa Dr. Lian Hmung Sakhong caah thlacam hi thawng ko hna usih, arian tuannak NUG hna hi doh in soisel hna hlah usih, rian ngantuk an khinh mi asi caah kan pa Dr. Sakhong mit hmai abit nak hnga lo zohchun tlak miphun si hna uish. Ka thin lung chung chuak mi Bible cacang: ” Na thawknak cu hme hmanhsehlaw na dawnghnak ah mi ngan na si lai’ (Job 8: 7)Lairam Laipa
Leave a Reply