Ralkap Kutdong le Chin Media Kutdong!

Media nih Miphun ca riantuan a herhnak hi tulio caan ah a fiang ngaingai. Thimnak kong ah cun party pakhat tanh in duh paoh in ca tial kha a poi loh. Mah le media min that le a rel tu tamnak caah phozar kha a poi tuk lo. Sinain tulio kan ram boruak le kan Chin ram le miphun boruak hi thlankhur kam dir lio caan asi tik ah, Chin media ai ti mi hna le thawngpang thanhnak a tuah tawn tu hna nih kan ram le miphun caah nan sining cio in dirh kamh caan asi.

Tulio kan Chin ram caah hriamntlai riantuan tu hna kong ah thencheu nak kong minung pakhat nih a tial mi le a ruahnak a langhter mi kha fak ngai in nan phozar tik ah, cunihcun miphun chung lungthin a tuai tam. Nan tialmi nih le a dik maw dik lo or asi maw si lo ti hletnak taktak facts um loin nan tar sa lam tik ah tulio kan ram sining he ruah ah cun kan miphun kha a thli thup in zuar bantuk asi.

Ngasa kha tiva va tleih cu a hman ko, sinain dawr an zuarlio caan ah va tleih cu fir asi. Tik cu le caan sining nih zoh thiam a hau tawn. Kawl ralkap nih an kut dong te an cawl ter i, mipi thisen a luang, media nih a dik lo mi le fian tak lomi kha mah zawn lawng ruah in nan kut dong te nan cawl ter leng mang cun, kan miphun lila thisen tamtuk luan ter khawh asi. Chin Miphun dawtnak taktak le zawn ruahnak kan ngei ko ah cun media nih lungthawhnak, lungrualnak, pui tling sinak kong kha tial le thanh i zuam hna usih.

Nihin tiang kei mah te hmanh nih ka hmuh khawh ning ah Chin media nih Chin miphun le Chin ralkap hna caah lungthawhnak le bawmhchanhnak an tial ka hmu rih lo. Kan thiam lo maw si, kan huam lo dek asi.

Live thlah le thawng pang thanh pin ah ram le miphun thancho nak caah thazang pe kho tu pakhat hi media asi ve. Ramtha le ramthumnak kan umnak ram hna hi a tu ban tuk kan sining dir hmun an phak tik ah, an news paper te hna, an TV le radio te hna hin mipi lung thawnnak le an ralkap thawnnak caah catial thiam le biachim thiam an fial hna i, chun he zaan he mipi sin ah an thlah theu tawn.

Cucaah Chin Media hna tutan hi miphun caah dir ve ding in kan sawm hna. Pastor le Khrihfabu le Evan pawl an rian simi thlacamnak in le chawva in miphun ca an tuan cang. Mino hna an nunnak thap in lam cung ah an chuak. CDM nih an rian kal tak in miphun caah an tuan.

Mi nei deuh nih an chawva in an tang ve. Khuachung mipi zong an neih chun arti le a chu zi in an tang ve. Chin Media zong nan tan caan a cu ve cang. A tang cia mi zong an um nain hrial awk si mi hrial zong kha Miphun riantuan phunkhat asi. Ruakhngak hangso mi kha inn um fa le vialte caah lawipi ding bawh le ngiat phun cu si hlah usih. Credit: Ronald Charles Nunuk