Ralkap Cungah A Kutdong Pakhat Hmanh A Cawi Kho Lo Ti An Rak Hngal Lo!

Daw Suu Interview: Kan Kawlram pumpi nih zalonnak taktak kan hmuh khawh nakhnga kum tampi aa zuam i tlaih le hrên a rak tongmi kan pi Daw Aung San Suu Kyi cu an rak tlaih lio le cawl kho loin an rak hren lioah tonbiaruahnak (interview) an rak ngeihmi cu nizan naite taktak February 03, 2021 ah YouTube ah an hun chiah i a zoh cang zong kan um lai nain a zoh rih lo nih hun zoh khawh a si.

Rohingya crisis ruangah vawleicung ram tampi UN telh in an rak theihthiam lo caah sual an rak phawt. Muslim ram pawl ko nih an rak huat a zual. Ralkap cungah a kutdong pakhat hmanh a cawi kho lo ti an rak hngal lo. Annih rual cu ramdangmi an si i biaknak dang zong an si caah an theihthiam lo zongah phundang. Kanmah ram chungmi rori Lai Party cheukhat rual hmanh nih November 08, 2020 election hlan liangluang mai bang an rak sam. Mah hna lakah US um pastor zei maw zong an itel ve cu teh. Suu Kyi le NLD soisel ah kan aw a rak thang ngaingai. Atu ah cun chim ding le soisel awk um loin ralkap rual nih an kan tlaihpiak hna ai.

Vawlei killi in minṭhatnak le upatnak an rak pekmi vialte cu pakhat hnu pakhat in an hun chuh diahmah. Nobel Prize tiang hmanh chuh an rak duh nain a duh lo nih an rak tei hna caah chut thai loin um lan a si. Asinain nihin ni ah cun muslim ram hna hmanh an lungfim ruangmang. Laksawng a rak chuttu hna rual kha umtu awk thei loin an izi lai dah. Zeicahtiah military regime rual dictatorship uknak cu an ifiang tuk hme cu. Daw Suu a rak si lo kha an hun fiang tuk cang lai. Mangchia manh i hun ihlauh bantuk khi an si.

Interview tuahtu nu nih ralkap pahnih zong a tuah ve hna. “Political prisoners thongtla pawl cungah hremnak, vuaknak le thahhnawnnak a phunphun an tuah an ti cu si maw?…” tiah a hal hna i ralkap le lihchim cu vawleicaan dongh tiang a dih ding phun si rua lo. “Mah bantuk nan rak theihmi vialte cu lih lawngte an si…” a hei ti salam ko hme cu. Credit: Lianbik Mualcin

Video