Minkin (မင်းကင်းမြို့) Khuami Pathum Cu Rallokap Nih An Thah Hna, An Thah Mi Hna Cu Tangkua Sianghngakchia, Khua U Pa Le USDP Party Tenhmi An Si Tiah Khuami Nih An Chim Sagaing ramthen,Minkin peng, Chindwin tiva in nitlaklei khua ah ralhrang rallokap nih luhhnawh hna in a luancia zarhkhat ah hnahnawhnak an pek hna tangkua kai mi sianghngakchia tel in mipi lei minung 3 an thah hna.
July 11 in 16 tiang ah khuathum in khuami pathum cu ralhrang rallokap nih an thah hna. Minkin peng, Inpinhlah khua ah ralhrang phu le pyusawthi(ပျူစောထီး) phu hna nih July 16 ah an khua ah an luhhnawh hna, tangkua cawnglio sianghngakchia Mawng Zuai Ko Ko (kum-19) cu rallokap kahnak in a nunnak a liam.
“Rallokap cu khuachung ah ra in ,aa thupmi pawl zong an tli, hngakchia zong, a tli mi poh cu an kah hna ,cu an kah hna nak ahcun an khen i a thih hi a si, an kah mi hna cu an hmuh mi poh an kah hna” tiah Sagaing ramthen mipi vengtu phu in ralkap Thu Rih Yah nih a chim.Inn pakhat zong an khangh, cheukhat inn hna cu an hrawh i thilmansung pawl zong an i kal pi tiah khua mi hna nih an chim.
July 13 ah Tanpoak khua in khua upa pakhat U Myint Swe (kum-60) zong ralhrang rallokap nih an kah nak in a nunnak aliam.USDP party tanh tu U San Win zong ralhrang rallokap hna cu a hrial hna nak ah a umnak inn Zinkalay khua ah eiding thir in a kal lio ah rallokap nih an kah caah a nunnak a liam.
” Amah cu USDP tha pe tu pakhat a si,ramlak zam in facang an ngeih ti lo caah facang a va lak nak ah an kah hi a si,a lu ah an kah , Ralhrang rallokap phu hna nih hin miphun thim lo, biaknak thim lo, party thim lo in an thah hna” tiah khuami pakhat nih a chim.
Ralhrang phu hna nih khuami an thah hna, inn an khangh piak hna, innchung ah lut in thilri an lak ,a phunphun an tuah ko nain ,lehrulh than ding ah i zuam zong ah rallokap lei biachimnak nawl ngeitu hna cu kan pehtlai kho hna lo.
Sagaing ramthen chung Yinmapin,Kani, Minkin,Kalay,Kanhbalu, Tanhsee le Palae peng chung ah April thla in July thla tiang ah voi 58 kahdohnak a chuak. Mipi vengtu phu in minung 67 an nunnak a liam i, ralhrang phu in minung 360 an thi cang tiah Sagaing ramthen mipi vengtu phu nih an lak mi cazin ning ah theih khawh a si. #TCP
Leave a Reply