NUG, CRPH le PDF bawmtu poh ralhrannak upadi in tazacuai i Dalaan poh tangka laksawng pek ding hal
SAC nih NUG, CRPH le PDF bawmtu poh tazacuai i Dalaan poh tangka laksawng pek ding le cu kong cu mizapi sin ah thanh ding in SAC chungtel hna nih August 23 ah tuah mi SAC meeting ah an hal.
Hi biatung dirh in a haltu hna hi SAC chungtel Dr.Bangyia Aung Moe, U Thein Nyunt, Mahn Nyein Maung, U Khin Maung Swe, Jeng Phang Nawtaung, Daw Aye Nu Sein, U Sai Lone Sai le U Shwe Kyein hna an si, MRTV nih a thanh.
Cun, PDF pawl raltuk a cawnpiak i hriamnam zong a bawmtu Tlangcung hriamtlai pawl kham ding siseh, atulio SAC kuttang ah rian a tuan mi hna upatnak roca pek ding zong an halchih, tiah MRTV nih a thanh.
(#Ralrin peknak: Thawng kan leh mi hi “Laica-The Hakha Times” tiin credit na pek duh tung lo ahcun copy paste i lak in nawnnok chin kan duh lo, tiah ralrin kan in pek).#PhotoThanLwinTimes; THT
Relchap: Kawlram chungah hrambunhmi 5BB internet service le ramlengah hrambunhmi Phone company Nokia Myanmar hna cu chawva le servicing ah buainak an ngeih ruangah kan i then cang lai tiah Nokia Myanmar nih August 22 ah cathanh a chuah.
Nokia Myanmar nih 5BB le mipi kar ah internet service he pehtlaih in lungtling lo nak a um mi cungah 5BB nih tha tein a silhnalh piak kho hna lo. Nokia Myanmar thawngin thil dik a chuak kho mi a si tiah a ti.
Hi kong he pehtlaihin 5BB nih Nokia Myanmar nih kan riantuan hna an hlen mi kum 1 caah sing 360 an kan pek lawngah internet kan pek than khawh lai tiah a chim.
Nokia team zong nih 5BB ah bill kan pek dih cang mi le official invoice kan ngei dih cang mi a si. Nokia Myanmar company nih branch vialte ah ISP provider in 5BB Broadband he kum 3 chung rian kan tuan ti cang.
Branch kip ah business plan thla 1 ah sing 30, kum 1 caah sing 360 cu bank in pek a si ahcun 7% tax pek chap ding an ti caah Nokia Myanmar riantuan hna nih 5BB head office ah kum 1 caah ISP contract min kan va thut mi a si.
Asinain, August 19 in internet hman khawh a si ti lo caah 5BB cu thil si ning kan hal mi a si. 5BB lei nih kan riantuan hna an hlenmi tu a si. Hi kongah zeihmanh bawmh zong an kan tim lo, 5BB nih customer hna harsatnak cungah tuanvo an lak lo mi cungah sual kan phawt.
5BB thil tuah ning a felfai lo ruangah thawng kan thanh khawh colh lo nak cungah ngaithiam kan hal hna.Cucaah, 5BB cu an tuanvo lak ding le kan contract a dih tikah cun kan tuanti ti lai ko tiin mipi sin ah thawng kan thanh mi a si tiah an thanh.
5BB hi Redlink min in Kawlram internet larka hrawngah internet service a tuah mi company pakhat a si i,hi kong he pehtlaih in biahal timh a si nain chawnh khawh an si lo tiah NP news nih a tial.
Leave a Reply