Ralhrang Tambiknak Naypyidaw Ah Pehtlai In Nithum Chung Meithal le Bomb A Puak Cang

Ralhrang Tambiknak Naypyidaw Ah Pehtlai In Nithum Chung Meithal le Bomb A Puak Cang

Naypyidaw Ah Ni Thum Chung Pehtlai In Puahkehnak A Chuak

SAC zung hmun Naypyidaw ah a luancia February ni 28 in March ni 2 tiang ni thum chung puahkehnak a chuak tiah Naypyidaw ummi nih an chim.
March ni 2, zanlei suimilam 6:00PM luan ah Zabuthiri peng Shwekyapin lam le Chai khua lamtonnak SAC ralkap le palik nih humhimnak la in sakhan an chiahnak check gate ah bomb puahkehnak a chuak tiah theih a si.

March ni 1, zanlei Naypyidaw Ayeyarwady lam kam ummi minung tampi an umnak le mi tampi an ṭhut tawnnak Mandalay Paradise eidin dawr ah puahkehnak a chuak.
A luancia February ni 28, ah Shwekyapin sang ummi USDP Party Central Counselor zong a si i U Thein Sein cozah chan lio zong ah Amyota palai in Vice Chairman ṭuanvo a rak latu U Mya Ngyein a inn cu kut cheh bomb puahhnawh in doh an rak tong tiah Naypyidaw khuachung ummi pakhat nih a chim.

USDP Party Central Counselor U Mya Ngyein a umnak inn doh a tonnak kong he pehtlai in Sittaung pahkahphah-NPT nih cun uknak a latu SAC rianṭuannak phen ah bawmtu dirhmun in a telpi hna caah kan dohmi a si tiah nihin March ni 3 ah cathanh an chuah.

Naypyidaw cu SAC nih hrambunh in zung a chiahnak hmun a si caah khua luh/chuahnak hmunhma hna cu fak piin chekhlatnak an tuah pin ah khuachung hmunhma cheukhat zong ah SAC nih security tampi laak in ralvennak fak piin a tuah tiah theih a si.
RFA