Ralhrang Rual An Phomh Hna Minung Ceilak An Thi Hoi

Shwebo Le Myinmu Ah Bomb Thianhnak A Tuahtu SAC Ralkap Doh An Tong, 7 An Thi

Sagaing ramṭhen, Shwebo peng ah bomb thianhfelnak tuah ding in a chuakmi SAC ralkap hna cu bomb puahhnawh in doh an ton caah 3 an thi tiah Bu Kya Yine Shwebo(LPDF) in ṭuanvo ngeitu nih a chim.

March ni 21, zinglei suimilam 8:00AM hrawng ah Shwebo peng pyusawhti tampi an umnak Nyaungkai khua in SAC ralkap le pyusawhti phu hna cu bomb thianh ding in an chuah ah tualchung hriamtlai phu hna nih padeta bomb lung thum puahhnawh in an doh hna caah SAC ralkap 3 an thi tiah theih a si.

Pyusawhti phu le SAC ralkap hna cu Bu Kya Yine Shwebo(LPDF) phu, Bu Japan Kyi(TTT)-SHWEBO (LPDF) le ṭangṭi phu 5 fonh nih an doh hna.

Sagaing ramṭhen, Myinmu peng Alatkapa(အလ္လကပ္ပ) khua le Wanpyi(ဝမ်းပြည့်) khua kar ah bomb thianhnak a tuahtu SAC ralkap hna cu bomb puahhnawh in doh an ton caah 4 an thi tiah Dog Killers PDF in ṭuanvo ngeitu nih a chim.

March ni 21, chunhnu suimilam 3:45PM hrawng ah bomb thianh aa thawhmi SAC ralkap 40 hrawng cu Wanpyi le Alakapa kar ah tualchung hriamtlai phu nih bomb an puahhnawh hna caah minung 4 cu hmakhatte ah an thi tiah theih a si.

“Bomb thianh aa thawhmi SAC ralkap hna nih cun kan hmanhmi bomb cu an hmuh caah hriamngan le hriamhme in an kah nain a puah lo caah a pawng ah an kalhnawh, cu lioah cun kan puahhnawh hna caah 4 an thi. An ruak cu Myinmu lei ah leilawng in an kalpi hna, kanmah lei cu kan him dih” tiah Dog Killers PDF in ṭuanvo ngeitu pakhat nih a chim.

SAC ralkap hna cu People’s Army To Fight Dictatorship(PAFD), People’s Knight Defense Force, Myinmu(PKDF.MMU) le ṭangṭi phu 4 fonh nih an doh hna tiah theih a si.