Ralhrang Tonpumh Lio Ah SSS-G Nih An Kah Hna,Bokyi Telh In 10 Hrawng An Thi Ralhrang Tonpumh Lio Ah SSS-G Nih An Kah Hna,Bokyi Telh In 10 Hrawng An Thi. Shan ramkulh thlanglei,Nansan khua ah ralhrang pawl tonpumhnak an tuah lio ah SSS-G nih an luhhnawh hna i an kah hna Bokyi telh in ralhrang 10 nak tlawm lo an thi tiah Southern Shan State Generations sinin theih a si.
August 15 zing suimilam 7 ah Nansan khua ah ralhrang tonpumhnak an tuah lio ah a tu bantukin SSS-G nih luhhnawh in an kah hna hi a si. Hi kahnak ah SSS-G lei in minung pakhat hliam a tuar,a fak cu a si lo tiah theih a si i,Shan ramkulh thlanglei ah ralhrang nih humhimnak fak deuh in an tuah tiah Mizzima nih a tial.
Relchap: Shillong Ah Buainak A Chuak, Khuapi chung Curfew a si August 13 ah Khasi hriamtlaibu pakhat HNLC general secretary hlun, cozah sin ah a pe cang mi Chesterfield Thangkhiew cu a um nak Mawlai ah palek nih meithal in an kah hnuah Shillong khuapi chung ah buainak a chuah caah August 15 zan thawkin Shillong khuapi cu curfew a si.
Palek nih an chim ningah Chesterfield Thangkhiew hi Shillong khuapi chung Laitumkhrah bazar bomb puah mi kongah palek nih an zumh lo caah tlaih dingin an kal lio ah Thangkhiew nih palek pawl cu nam he a rak doh hna ruangah kan kah mi a si.A fale pahnih zong kan tlaih chih tiah an ti.
Cheristerfield chungle nihcun tunai ah a damlo ruangah duhning hmanh a cawlcang kho lo mi a si. Palek hna doh ding cu a si kho lo. Palek nih i kahnak lem (fake counter) an tuah mi a si tiah an ti i, Meghalaya i bu dangdang hna zong nih palek pawl cawlcangh ning cu tha an ti lo pinah home minister cu a rian in i phuah dingin an ti.
Mah hi Khasi mipi nih an zum lo.Palek hna nih an kahnak hma hi a fak ngai nain sii inn ah an kalpi colh lo. Siibawi hna nih Thangkhiew hi civil hospital a rak phanh ah a thi cang tiah an ti tiin an chim.
Mah bantuk thil a si ruangah Khasi mipi cheukhat nih Mawkynroh palek outpost i khuachungah a chawk mi palek mawtaw cu Mawlai ah an meithal he an chuh hna i, palek hna zong ramtangah an zaam tiah theih a si.
Cheristerfield Thangkhiew ruak hi nizaan ah vui a si i, Hynniewtrep Youth council le bu cheukhat nih black flag day ah an thanh i Shillong hmun dangdang ah flag nak an thlai pin ah mipi nih lam an zawh.Khasi mipi cheukhat nih palek mawtaw an chuh mi ah thantaar nak mi an thlai i Shillong khuapi chung Khasi pawl umnak veng Mawlai le Jaiaw veng chungah an i chawh pi hnuah Palek mawtaw hi Mawlai ah mei in an khangh.
Cheristerfield Thangkhiew thihnak kong he pehtlaihin Meghalaya chief minister Conrad Sangma nih mah thihnak kong cu magisterial enquiry kalpi a si lai tiah a chim.
An boruak cu a rit ngai caah Meghalaya cozah nih nizan suimilam 8 in August 17 zing suimilam 5 tang curfew thanh a si i, sianginn le dawr vialte khar dih a si pinah internet line zong phih a si tiah highland post nih a tial.TCP
Leave a Reply