Ralhrangbu Cawlcanghnak Ruangah Dipeyin Pengchung khua 10 An Zaam Sagaing ramthen, Dipeyin pengchung ah ralhrangbu nih ni 2 chung khuakhat hnu khuakhat an luhhnawh hna ruangah khua 10 hrawng an zaam tiah theih a si.
Nizaan August 8 ah Nyounghla le Weci khua ah ralhrangbu a lut mi hna nih khuami cheukhat an tlaih hna lengah khuachung phone dawr le thil phunphun an zuarnak dawr hna cu an hrawh.Mawtaw cycle zong 20 leng an khangh.
Nyounghla khua NLD party chungtel pakhat inn cu an hrawh pin ah Marakan khua meihul zuarnak dawr pakhat cu mei in an khangh. Ralhrangbu hna hi khua pawngkam ah an um i, zeitik poh ah a rak lut than kho mi an si ruangah khuami hna cu khua chungah um ngamlo in an zaam hi a si tiah khuami hna sin in theih a si.
A zaam mi khua hna hi Dipeyin pengin Namya, Marakan, Yincei, Murokung, Paucin, Myoci, Masoring, Cutaw, Nyounghla le Weci khua hna an si. Ralhrangbu hrial in a zaam mi hna hi Mu tiva tilianh ruang le leikuang lawng a si i dornak hmuntha zong an ngei lo tiah theih a si.
Ralhrangbu hna hi khuachung an lutnak poh meithal ngan in an kah, meithal an puah pin ah Nyounghla khua ah cycle a chawk lio mi pakhat cu meithal in an kah ruangah nizaan ah khan a nunnak a liam.
Ralhrangbu hna cawlcanghnak he pehtlaih in khuami pakhat nih ‘Khua a lut/chuak mi hna hi 160 hrawng an si. Khua an lut poh ah hriamngan an puah, meithal zong an puah pin ah Tarnu/tarpa hna zong an hro. A cheu cu uniform zong an i hruk lo, civil mi an si rua. Cheukhat cu an meithal kuan a chuah le chuah lo hmanh a hngal lo mi an si.
Ralhrangbu nih an luthnawh mi khua chungin Marakhan khuami 2, Nyounghla khuami 1, Weci khuami 3, Moekhatui khuami 7 le Piaciah khua NLD chungtel le a chungkhar minung 3 telin minung 5, an dihlak 18 an tlaih an si tiah theih a si.
Atu bantukin ralhrangbu hna an cawlcang mi hi August 7 ah Dipeyin peng Saipyin le Ciyua pawngah ralhrangbu mawtaw cu PDF nih bomb an puah hnuah a si i, June thla chung ralhrangbu le PDF i kahnak ruangah khua 20 hrawng an zaam.
Kan hnu July thlachungah ralhrangbu hna nih PDF lawng si lo in ralzaam hna cu hriamngan, meithal hme he an kah hna ruangah PDF le khuami 30 leng an nunnak a liam.TCP
Leave a Reply