Ralhrang Nih Mei In An Khangh Hnu Ah A Nunnak A Liam

Maing Myone, Aye Chan Thar Sanpya khua ah ralhrang pawl nih meithal in an hliamh mi Ko Min Min cu a nun buin mei in an khangh. Cupiah kum 14 a si mi Maung Tun Myint zong meithal in an kah thah tiah theih a si.

Ralhrang pawl nih hin khua mi a tlawm cem 10 an thah hna lai tiah cuka khuami pa pakhat nih a chim. Magaui ramthen, Maing Myone, Aye Chan Thar Sanpya khua ah September 14 ah an luh hnawh hna i mipi cu an kah hna.

Ralhrang pawl khua chug an rak luh cun khuami pawl cu an zaam hna i Ko Min Min hi a ke ah meithal in an khenh i a zaam kho ti ko caah an tlaih. Maung Tun Myint zong thi lak in meithal in an kah tiah theih a si. Ko Min Min hi ralhrang pawl nih cun an tlaih i a nun buin mei in an va khangh hi a si. (KTM)

Relchih! KhinOo peng ah Mytel tower tung bomb puah in an hrawh; Sagaing ramthen,KhinOo peng Dankung khuapawng Mytel tower tung cu September 15 zaan ah bomb puah in an hrawh tiah khuami hna nih an chim.

Mytel tower tung cu zaan suimilam 9:00 hrawng ah bomb puah in an hrawh hi a si tiah khuami pakhat nih a chim hi tower tung cu zei phu nih dah bomb puah in hrawh a si hi theih a si rih lo, KhinOo peng ah Mytel tower tung hrawh mi 9 nak a si cang. Ramchung ning in Mytel tower tung hrawh mi hi 80 leng a si cang tiah theih a si.