Ralhrang Nih Kum 2023 Tuah An Timh Mi Cu, A Mak Taktak, Tidim Le Paletwa pengkomh (District/ခရိုင်) pahnih chap an timh

Ralhrangbu nih kum 2023 ah tuah dingmi rampi thimnak ah Proportional Representation (PR) thimning hman an duh caah Chin ramkulh Paletwah le Tidim peng ah pengkomh (District/ခရိုင်) pahnih chap an timh tiah Social Media ah a kaimi ca pakhat ningin theih a si.

Chin ramkulh ah Falam pengkomh, Hakha pengkomh, Mindat pengkomh le Matupi pengkomh tiin pengkomh 4 an um. Paletwah le Tidim ah an chap ahcun pengkomh 6 a um lai tinak a si.

Chin ramkulh lawngah si loin ramṭhen le ramkulh dang zongah pengkomh chap an timhmi a tam ngai. Atu tiangah ramṭhen le ramkulh ah pengkomh 74 an um i ralhrangbu nih pengkomh 42 chap an timh caah pengkomh dihlak 116 a um cang lai tinak a si.

Biapeh: Nov 5, 2021 Rangoon ramṭhen cozah zungah ramkhel party cheukhat he tonnak ralhrangbu khanhmi Union Election Commission (UEC) nih Proportional Representative (PR) cu 2023 thimnak ah hman dingin an rak chuahpi cang nain ralhrangbu (SAC) chungtel U Khin Maung Swe hruaimi National Democratic Front (NDF) party nih an rak duh lo tiah theih a si.

NLD chan ah hmanmi thimning First Past The Post (FPTP) cu vote tambik a hmumi party nih cozah ser khawh a si. Cucaah teinak a hmumi NLD nih anmah lawngin cozah an rak ser. Ralhrang party a simi USDP le party cheukhat nih FPTP thimning hi an duh lo, a ruang cu thimnak ah teinak an hmuh bal lo caah cozah an ser kho lo. Cuticun vote hmuhmi zulh in party kip nih palai thlah in cozah ser khawhnak thimning Proportional Representative (PR) hi kan hman deuh awk a si tiah ralhrangbu nih an chuahpi.

A ngaingai tiah cun ralhrangbu kuttang um UEC le USDP nih an duh lomi thimning PFTP hi ralhrang nih an rak sermi 2008 phunghrampi ah an telhmi a si. Anmah nih phunghrampi hmanh ah an rak telhmi PFTP thimning cu anmah tlaknak le rawhnak a si ti an i fian tuk cang caahi PR in thlen an timhnak hi a si.

Ralhrangbu nih nawlngeihnak an lak hnu tlawmpal ah NLD chan Union Election Commission (UEC) cu an hrawh i an duhmi minung hna cu khanh in UEC cu an ser ṭhan i 2010 thimnak ah hruaitu a simi ralbawi hlun U Soe Thein cu UEC Chairman ah an chiah colh. Cuticun anmah caah a ṭha dingmi PR thimning hi an chuahpinak a si.

A ngaingai ti ah cun PR thimning a chuahpi hmasatu hi National Democratic Front (NDF) an si. NDF in Daw Khin Wine Kyi nih 2014 ah Amyotha Hlutdaw ah a rak chuahpi. USDP le ralhrang palai hna nih an lungtlin ko nain PR cu 2008 phunghrampi he aa kalhmi a si tiin an rak hnonmi a si.The Chin Post

Be the first to comment

Leave a Reply

Your email address will not be published.


*