Ralhrang Nih Kahdohnak Tuah An Timh Caah Minung Thonghra leng An Zaam Ee

Myaung Peng Ah SAC Ralkap Nih Rallam An Sial Caah Tualchung Mi 10,000 Leng An Zaam

Nihin March ni 21, zinglei ah SAC ralkap nih Sagaing ramṭhen, Myaung pengchung Panngyo(ပန်းညို) le Nyaungkaya(ညောင်ကားယား) khua ah rallam an sial caah khua li in tualchung mi 10,000 leng nih ral kan hrial tiah Myaung tualchung mi hna nih an chim.

SAC ralkap 50 hrawng khuachung an luh caah a himnak hmun ah kan tli zaam hna tiah min langhter a duh lomi Myaung khuami pakhat nih a chim.

“SAC ralkap nih rallam an sial lengmang caah a tli zaammi hi ni khat thong hra reng lo hi kan si tawn. SAC ralkap an kal cang ti thawngpang kan theih ah khuachung kan lut ṭhan, cheukhat cu ni thum hrawng a rauh hnu ah khuachung ah an lut, tlik zaam peng cu a si lo nain SAC ralkap nih rallam an sial caan ah cun khua chuahtak in kan hrial tawn” tiah a chim.

SAC ralkap hna nih cun Panngyo khua thlanglei ah a ummi tualchung hriamtlai phu hna an umnak sakhan hme pakhat le Panngyo le Nyaungkaya kar ummi sakhan hme pakhat cu an khangh tiah khuami nih an chim.