Facebook Profile ah NUG cohlannak le lungtlinnak hmanthlak a tarmi lemcang (Artist) cheukhat hna telh in minung 63 hna cu ralhrang nih tlaih in a timh hna timi thawng theih a si. Hi kong he pehtlai in Rangon ramthen palek bawi pakhat nih “Hihi a hmaanmi a si ko” tiah fehternak bia a chim.
“A si ko, NUG Profile a hmangmi hna mincazin lak dih ding timi nawlpeknak kan hmuh ko. Cun NUG, CRPH le PDF cu ralhrangbu ah thanh an si cang bantukin ralhrang upadi ningin dantat an si ko lai” tiah Rangon ramthen palek bawi pakhat nih a chim.
Ralhrangbu nih ralhrang upadi hi kan hnulei te ah khan an remh i cu upadi pohmah 52 (a) hmang cun NUG Profile a hmangmi hna cu dantat an si lai tiah ralhrang nawlchuahmi ah an tial.
Ralhrang upadi pohmah 52 (a) hi ralhrang dirkamhnak upadi a si. Hi upadi ningin sualpalhnak a ngei ko tiah hmuhmi cu a tlawmbik kum 3 in kum 7 tiang thongdan pek khawh a si pinah tangka liamter khawh a si.
Rangon ramthen in palek bawi dang pakhat zong nih NUG Profile a hmangmi an tam tuk i anmah cawnpiaknak caah minthang cheukhat hna cu dantatnak tuah ding, mipi nih NUG Profile hmang lo ding le langhngang tuk in NUG dirkamhnak tuah lo dingin ramchung vuancizung (Ministry of Home Affairs) nih nawl a kan pek tiah a chim. Atu tiangah NUG Profile a hmangmi mipi nuai 3 dengmang an si cang tiah tuanvongeitu hna nih an chim. Khit Thit Media
Leave a Reply