Ralhrang Motor Le An Raltuknak Tank Chin Ralkap Nih An Hrawh Dih Mi Cu Lung A Hmui Tuk, A Sinain Chuncung Khua Inn Lo Vialte Kangh Dih Ding Cu Lung A Nuam Lo

Ralhrang Motor Le An Raltuknak Tank Chin Ralkap Nih An Hrawh Dih Mi Cu Lung A Hmui Tuk, A Sinain Chuncung Khua Inn Lo Vialte Kangh Dih Ding Cu Lung A Nuam Lo

‘Inn karlak le biakinn lei zong kha bom rak thla thluahmah u’ tiah Chin ralkap pakhat nih drone team pawl order a pek len hna. ‘Bom an thlak hnawh, inn a kang thluahmah le an hriamnam a puak thluahmah cang ko kha’ tiah pakhat nih phone in a cunglei upa a chimh i ‘a tha tuk, a tha tuk, video kha rak thla te u’ tiah a leh ve.

‘A kang ve cang khi, a pam tuk ee, a poi tuk’ tiah video background ah Chuncung holh in mino cheukhat an ngaihchiatnak aww zong Chelsea Bawi nih a tarmi video ah theih khawh a si.

Chin ralkap nih MAH ralkap an hriamnam le an motor tampi an hrawh khawhmi cu lung a hmui tuk, khat lei ah Chuncung inn lo a ciam dih vemi cu ngaih a chia tuk than. Pathian tu nih in hnemh hram ko hna seh law.

Relchap>>>>>Ralkap budget 5.6 trillion le Chin ralkap: Kuanpi bak in an i phomh cang ko lai
====
Kalay in tutan a rak kaimi MAH ralkap hna cu Chin ralkap hna nih an chei ngai hna timi a lang. Drone hi hmual a rak ngei hringhran, jet vanlawng bak asi ve ko. Tuhnu motor in rak kai an i tim ahcun voi 10 an ruat hmasa a hau cang lai tinak a si.

MAH ralkap tam deuh thah ahcun an kan tih lai i an rak chap duh ti hna lai lo timi hi dik sehlaw lawmh a um tuk hnga. Nain, zakhat an thih ah thongkhat an rak chap hna lai a fiang. Rampi phaisa vialte anmah kuttang ah a um fawn caah a sifak deuh Kawlmi tor le cheng ralkap an lut chap lengmang fawn. A thimi nakin a thar a lutmi an tam deuh kho.

Nizaan tihni bak kha MAH nih kumkhat caah ralkap budget 5.6 trillion(kyat) bak approve a tuah hoi, US dollar in 2.7 billion hrawng a si. Billion pakhat ah million thongkhat a um, dollar million thongthum deng an budget a si tinak (CNA budget an suaimi kha $25 million lawng a si, zeizat an ngah kho te lai a fiang lo). Nikum MAH ralkap budget kha 3.7 trillion a rak si, tukum cu trillion 2 deng a tam deuh.

Myanmar rampi sipuazi GDP zong 2022 chung ah 3% bak a thangcho i 2023 zong ah 3% tal a thangcho rih lai tiah World Bank nih an thanh, US sipuazi GDP khi 2022 ah 2.9% lawng a thangcho. Ralkap kuttang ah mizapi ruah ning tluk in rampi sipuazi a rawk lo tinak a si.

Tukum chung cu Chin ralkap an thawn deuh bang, MAH ralkap zong an cian deuh ve lai i an hriamnam tihnung deuhmi an hman thluahmah ve lai. A kar lak ah mipi tem tuarnak zong a fak chinchin ve te lai, aho hmanh nih thlauh khawh le thlauh awk zong an tha lai lo, khuate ummi cu vawlei khor tu i cawh cio awk a si ko cang.Crd….Salai Lung Thli Tum