Ralhrang He Neihniam Tein A Um Ko Mi Dalaan Theih Ko Mi Cu Ngeihthiam Awk An Si Lo Nain

CDF-Hakha nih RC Father an tlaih than ti a si. Ralrin peknak biahren (4) he an thlah than hna tiah an langhter mi ka hmuh; Midang a mah bantuk in Dalaan tlaih si hna sehlaw thah an si ko lai, a ruang cu ralkap he neihniam taktak in a cawlcanghnak evidence tampi langhter a si. CDF-Hakha nih rak tlai hna hlah sehlaw Ralkap kut in CDF-Hakha pasaltha nunnak zeizat dik a rak liam hnga ti zong ruahchih ding a tam pi

RC Khrihfabu hi ram politics nak in an mah Khrihfabu politics ah a tui deuhmi an si zungzal. Ram a daw ngai bantuk in zingzaan a au mi, voikhat hnih te CDF, CNF phaisa bawmh in miphun a dawbik tu bantuk in a au khuang len mi zong, RC father tlaih a si timi thawngpang a hun langh bak in, CDF-Hakha that lonak, sualnak hoih in heh tiah an timeline an hun tial.

Atu lio caan ah, a ruahnak a bituk mi, Chin ram huap politics nak in Khrihfabu politics ah a tui deuh mi, Khrihfabu le mah khua politics vial lawng a cuan kho mi, minung hna hi kan ral sunghnak an si te lai. An mah pawl hi Dalaan tluk in tihnung an si ve hna timi zong ralrin cia ngai a herh. Salai Hrang Hup

Relchap: Myanmar ram aiawhtu UN palai a simi U Kyaw Moe Tun thah ding in US ah a ummi Myanmar rammi pakhat an hlan, tiah Reuters thawngzamhnak nih a ttial. New York ah a ummi bu pakhat nih U Kyaw Moe Tun thah ding in Myanmar rammi pa an hlan hi a si.

Asinain, an hlanmi pa nih U Kyaw Moe Tun cu thah loin a thli in a pehtlaih in thah ding in an hlannak kongkau a phuan dih, tiah Reuters nih a ttial. RFA nih, “U Kyaw Moe Tun thah ding in an hlanmi pa cu FBI nih an kalpi cang. Hi Myanmar rammi pa hi US ah Visit Visa in a rak rami a si i, US ram ah i dor thai ding in a sokmi zong a si,” tiah a langhter ve.

Hi kong he pehtlai hin RFA nih U Kyaw Moe Tun pumpak an pehtlaih i bia an hal nain “FBI nih an tawlrel cuahmah lio a si caah keimah pumpak nih dikthlir in chim awk a ttha rih lo. Anmah US cozah lei zong nih thawngpang an chuah rih lo tik ah ka theithiam rih ko u,” tiah a leh hna.

U Kyaw Moe Tun nih, “Na nun a him lo tiah thawng cu an ka thanh. Palik nih hlathlainak an tuah cuahmah lio a si. Keimah pumpak nunhimnak zong palik nih ttuanvo an lak ko,” tiah Reuters thawngzamhnak ah a chim.

Reuters thawngzamhnak nih FBI sin ah Email in bia an hal nain FBI lei nih, “Mah bantuk nunhimnak lei ttuanvo laknak kong cu mizapi sin ah dikthlir in kan phuang tawn lo,” tiah an leh.
U Kyaw Moe Tun cu SAC nih uknak an lak hnu ah UN ah SAC aiawh loin Myanmar rammi aiawh in kut zung thum thlir buin bia a chimmi kha a si.The Chin Journal; August 5, Yangon
(Ref: Reuters, RFA)